COVID-19 KAN DO DAN HER DANGLAM HRET A NGAI - C. Lalhriatpuia

#Vanglaini & Zozam Times Article #

COVID-19 KAN DO DAN HER DANGLAM HRET A NGAI 

- C. Lalhriatpuia

Mizoram sorkarin COVID-19 avangin April 19, 2021 atangin Total Lockdown a puang a, ni 50 hnuah pawh hri kai kan tlahniam thei chuang lo. Total Lockdown puan atanga ni 53-na, June 10, 2021-ah phei chuan Mizorama kai tam ber ni thlengin, mi 347 zetin an kai thar a ni. Chuvangin, tute tan pawh Total Lockdown ringawt hian min chhan lo tih leh, hripui a dangchat lo tih a chiang tawh viau a ni. 

Hetiang hi kan dinhmun a nih avangin Mizoramin COVID-19 hripui kan do dan hi her danglam hret a ngai ta niin a lang. 

1. SAMPLE TEST RUNPUI NEIH A NGAI : 

COVID-19 Second wave kan hmachhawn mekah hian hun hmasa lam ai chuan a veite hian an la na ta hle mai a. A natna hrim hrim a thawk na sawt a nih theih rualin, thil chiang em em chu – a vei tam takten enkawlna an dawng har tih hi a ni. Symptom lanchhuah hnu chauh a an vei tih hriatchhuah, tlaikhawhnu a enkawlna dawng chauh an tam em em a, natna in a luhchilh nasat hman avangin thih phah ta pawh kan tam ta reng a ni. Thih phah chiah lo pawh, ICU a enkawl ngai, Ventilator hman ngai an tam phah ta em em mai a ni. Chuvangin, a veite hi a rang thei ang bera hmuhchhuah zung zung a, natna in a luhchilh thuk hma a enkawl dam zung zung a ngai a ni. Chutiang tur chuan Sample Test Runpui (Mass Detection Drive) neih a ngai a, damdawi lama Mizoram dinhmun pachhiat zia ngaihtuah phei chuan hei hi tihmakmawh niin a lang. 

Hetiang tur hian kan test theih zat (testing capacity) kan tih pun a ngai a, test-na rintlak tawk lo, 50% vel chauh rintlaka ngaih RAgT kalsan a, test-na tha bera ngaih RT-PCR hmanga a tam thei ang ber kan in test a ngai a ni. ZMC mai bakah Private Hospital leh Private Lab thenkhatte hi Testing Laboratory din turin sorkarin ngen se la, a din thei an awm chuan Laboratory dinna kawngah nasa takin tanpui bawk se. 

2. VACCINE CHAK ZAWKA PEK DAN NGAIHTUAH A NGAI : 

Mipui vantlang hriselnain hri a dan theihna (herd immunity) awm thei tur hian a natna a zirin vaccine pek ngai zat a inang lo thluah mai a. Sentut dang tur hian population awm zat atanga 95% vel vaccine pek a ngai a, a bak 5% chu hei hian a veng thei a ngaih a ni. Polio (Zenghri) leng thei veng tur hian population awm zat atanga 80% tal vaccine pek a ngai bawk. Israel ram khuan April thla thleng khan an ram mipui awm zat atanga 56% vel COVID-19 Vaccine an pe tawh a, hri kai zat pawh nasa takin a tlakniam phah a ni.

COVID-19 bikah hian Herd Immunity nei turin engzatnge pek ngai tih hi sawi chian fak theih ni lo mah se, mithiam hrang hrangte rin dan chuan 80% vel tal pek a ngai dawn niin a lang (a vaccine that danah thui tak a innghat bawk a). Chuti a nih chuan Mizorama COVID-19 dang chat tak tak tur chuan mi nuai 10 vel (2021 projected population atanga chhutin) vaccine pek a ngai dawn tihna a ni. 

Hetiang a nih lai hian Mizoramah January 16, 2021 atangin COVID-19 vaccine pek tan a ni a, H & FW Dept. data-a a lan danin June 5, 2021 thleng khan Vaccine First Dose la tawh mi 2,66,613 an awm awm a, dose 1-na leh 2-na la zo tawh (fully vaccinated) mi 52,191 an awm bawk. Thla 5 chhungin state population (2011 census) atanga 4.75% chiah COVID-19 Vaccine kan pe tihna a ni a, a ropui lo angreng khawp mai. 

India ramin Vaccine kan indaih loh dante, population mila sorkar laipuiin a sem dante hre tho mah ila, COVID-19 vaccine hi chuh chak lehzual dan ngaihtuah chu a ngai a ni. Vaccine hi mut mawh hnar mawhah neih tak tak a ngai; hei hi COVID-19 dona kawngah chuan a pawimawh ber a ni si a. 

3. RELIEF MEASURE ATAN STATE BUDGET HMAN A NGAI TA : 

COVID-19 leh a ken tel Total Lockdoawn avanga kan tawrhna hi nasa tak a ni ta. Zep nak emaw, chhungkaw tam tak leh sumdawng tam takte phei chu khaichhuah leh harsa khawp dinhmunah kan ding der tawh a ni. Hetih lai hian Mizoram sorkar hian harsatna tawkte chhawmdawlna leh khaichhuahna kawngah hmalakna a nei mumal lo hle a. CM Relief Fund (mipui thawhkhawm) hi kan ring deuh chawt mai niin a lang. Harsa taka awm mek mi rethei zawkte, sumdawng tam tak te, Tourism lama eizawng te, Industry hrang hrang te, lirthei khalh a eizawngte leh a dang tam tak, COVID-19 leh Lockdown tuar nasa zualte tan hian State Budget atangin chhawmdawlna tur ruahmanna siam thuai a ngai a. Kan Budget siamthat (reappropriate) a ngai a nih pawhin tlawma la lo a, siamthat mai nise a duhawm hle. Tui bill leh Electric bill thlenga FREE chin nei a ngai ta. Ruahman lawk ni miah lo Rawmi rua chin nana vaibelchhe tel kan la hman mai theih chuan, he thil hi thil harsa tur niin a lang lo.

 4. THIRD WAVE ATAN INBUATSAIH A  NGAI : 

Vaccine chungchanga kan dinnhmun that tawk loh zia kan tarlan tawh atang khian he hripui hi kan la dangchat mai dawn lo tih a chiang hle a, chuvangin, COVID-19 thawh thumna hi a lo thleng ngei turah ngaih tur a ni. State dang tam tak pawh thawh thumna lo thleng hmachhawn turin an inbuatsaih nasa hle a ni. Mizoram pawh hian Total Lockdown puan leh ringawt thin piah lam deuha inbuatsaih kan ngai ta niin a lang. Oxygen tam zawk siamchhuah a ngai a, ICU leh ICU bed tam zawk kan mamawh a, designated Hospital tur pawh ruahman lawk a ngai hial maithei. Symptom neilote enkawlna tur Care Centre siam belh a ngai a (hemi kawngah hian Kohhran hrang hrangte Care Centre siam tura ngen nise). Chutiang a nih loh a, Total Lockdown hmang ringawta COVID-19 kan do dawn a nih chuan mipui kan rethei lutuk dawn e. Kan Health Minister zahawm tak pawh hian tlawm taka thusawi leh ringawt thin piah lam deuhah heti zawng hian chak lehzualin hma la teh se.