Mizo Press Releases
No.1006/2021-2022
Aizawl the 17th June, 2021 : Covid-19 vaccine hi India ram pumah ni 16th January 2021-a pek tan a nih rual khan Mizoram-ah pawh tan ve nghal a ni a. Tun dinhmunah hian Health Care workers, Frontline Workers, kum 45 leh a chunglam-te bakah kum 18 -44 inkar hnenah vaccine hi ngawrh taka pek mek zel a ni.
Aizawl khawpui chhungah chuan veng tinah District hotute leh LLTF te ruahmanna angin a tahtawla pek mek zel a ni a. Online registration hmanga vaccine lakna hmun pawh hawn zel a ni. District dangah pawh District hotute ruahmanna anga pek mek zel a ni.
Covid-19 Vaccination chungchang-a hriattur pawimawh hrang hrang te:
1. Kum 18 -44 inkarte tan CoWin a in register hmasak chungchang:
Kum 18-44 inkarte tan CoWin ah in register hmasak a ngai a. Hei hi smartphone atangin tih theih a ni. Phone pakhat atangin mi 4 a in register theih. In register thiam lo/ thei lote tan khawtina Common Service Centres te puihna a lak theih a, emaw Mizoram Covid-19 Helpline No. 102 (toll free)/ 0389 – 2322336/2323336/2318336 ah zawh theih a ni. Vaccine lakna hmunah pawh a thawktute puihnain in register theih tho a ni.
2. Second dose chungchang:
Covid-19 Vaccine (COVISHIELD) hi 1st dose lak ni atanga kar 12 (ni 84) leh kar 16 (ni 112) inkarah 2nd dose hi lak leh tur a ni a, 2nd dose lak hunah hian SMS dawn tur a nih tawh loh avangin, mahni lak hun hi lo in chhut tur a nih bakah 2nd dose lak leh dan tur ruahmanna thuneituten an rawn siam te lo ngaihven that tur a ni bawk e.
3. Second dose kar 12 aia pek hma theih dan:
Heng tulna bik hrang hrangah chuanfirst dose leh second dose inkar hi a pawh tawi theih a ni -
1) Zirlai, India ram pawna zir mek emaw zir tur, an zirna hmun pan hun tawh te
2) India ram pawna hnathawk, an hnathawhna hmun pan tul tawh te
3) Infiam mi leh a khaihnawih, Tokyo Olympic Games a tel tur te.
Heng mite tan hian Vaccine 2nd dose lak phalna hi DC/CMO te hnen atangin ahnuaia mi te keng hian lak tur a ni.
1) 1st dose an lak atangin ni 28 a ral tawh tih finfiahna (Covid Vaccine 1st dose Provisional Certificate)
2) Zirlai tan chuan an zirna hmun pan tawh tura kohna lehkha emaw admission an hmuhna lehkha
3) Hnathawk tur tan, interview tura kohna emaw hna zawm tura kohna lehkha
4) Infiam mi tan, Tokyo Olympic Games a tel tur a kohna lehkha
A chunga tarlan te hian Covid-19 vaccine an lakna Photo ID proof atan hian Passport an hmang tur a ni. 1st dose an lak lai a Passport an hmang lo a nih chuan DC leh CMO hian Final Certificate leh an passport number te ziak langin Certificate an pe chhuak leh tur a ni.
4. Covid-19 vei tawh te Vaccine lak theih hun - an dam atanga thla 3 hnu-ah Vaccine hi pek theih a ni.
5. Vaccine 1st dose la tawhin Covid-19 a vei chuan - a dam atanga thla 3 hnu-ah 2nd dose a la thei ang.
6. Nu nau hnute pe lai tan Covid-19 vaccine hi lak phal tawh a ni.
7. Identity card mumal nei lo te tan - Covid-19 vaccine hi mi zawng zawng tan a ruahman a nih ang in, mipui zingah Indentity card ruahmansa 7-te nei lo te pawh pek theih dan tur ruahmanna siam a ni.
8. Covid-19 Vaccination drive ah hian Kum lama upa te, Pianphunga rual ban lo (Differently abled Persons/Persons with Disabilities) te leh Rilru lama harsatna nasa-tak/liantham nei (Persons with severe mental illness) a bik takin chenna tur nei lo emaw mahni chenna in chhuahsan a vakrawlai (Homeless) te duhsakna (priority) pek tur a ni. Veng/khaw tinah LLTF/VLTF te’n hetiang an awm leh awm loh te thlithlai a, vaccine an lak theih nan hmalak thin ni se.
9. MoHFW, Government of India lehkha No.1940407/2020/Imm ni 19th May 2021 in a sawi angin, Covid-19 Vaccine lak hmain Covid-19 vei leh vei loh test kher a ngai lo a ni.
10. Damlo serious dam leh – Damlohna serious tak,
ICU a awm ngai hial emaw damlohna serious dang vanga damdawiina awm te chu an dam hnu kar 4 ral hnuah vaccine an la thei ang.
Written by: Dr. Saithantluangi Zote, MIS, IPRODated: 17th Jun 21 3:00 PM
إرسال تعليق