LOCKDOWN @AIZAWL

-Hluna Hauchhûm

(Aizawl khawpuia mi hausate u, luang chhuak ve ru le....)

Covid-19 hripui chanchin lam chu sawi tur ka hre ve lo, mithiamte ziak pawh kan chhiar seng lo tep a ni. He hripui avanga mi tam takin nunna an chan tawh thu leh, hemi kaihhnawiha chhungkaw tam tak an buai nasatzia te, Ruling Party leh Opposition Party ten Covid dona kawnga tum thuhmun kan nei thei lo te, indemtawnna leh inpuhmawhna nasatzia te, sum chevelin mipuite rinhlelh a kai ruk dan te, Central lam atanga Disaster Fund duh zat zat awm thei reng niawm tak a nih laia mipui thawhkhawm ngai tlat te, MLA Fund pawhpen te leh Sawrkar hnathawkte hlawh Cut-sak hial ngai tih vel lam hi chu mithiamte sawi turah i dah daih teh ang.

He Covid hripui hi chuan nunphung hi a tikhaihlak nasa mang teh e maw!!! Sawrkar thuneitute a timangang a, mithiamte lu a tihai a, NGO hruaitute a tihah em em mai bawk. Mithiamten ruamhnanna an siam a, chu chu dik tawk lo leh tha tawk lo nia ngaiin mi fing dangte an lo phunchiar a. Tawlreltu nih hahthlak turzia hi suangtuah phak pawh a ni lo ve. Helam pawh hi i kalsan daih teh ang. An tih ang angin lo awm ve phawt mai ila. Thu lo awi ila, himna nia an sawi hi i zawm ve rih phawt ang.

Himna tura ruahman zingah a aia tha min la kawhhmuh mai theih si loh avangin inkharkhip (Lockdown) chu regular tak leh khauh taka kalpui chhoh mek zel a ni a. A aia sawt zawk kan hriat miau loh avangin Aizawl khawpui leh keini thingtlang khua, (Politician ten an duh changa Zokhua min vuah ve leh thin) ah pawh he inkharkhip hi inang tlangin kalpui a ni mek a. He inkharkhipin mipui a nghawng dan leh a behbawm hi sawi teh ang.

Thingtlang khua min han lockdown ve ngei a. Khawpui nen nunphung inang lo ta chu khawpuia sawi leh tih ngai lo hi thingtlang mimawl zingah chuan kan lo ti leh thin lo thei lo va. Covid hri kai hlau lo va Task Force duty hlau zawk daih mipui zingah chuan rorel tur hi a tam bik em em mai a. Task Force theuh theuh hi kan inhahhleih em em ta mai a ni. Zan khawtairek leh tlaivara duty thei ta lo chuan harsatna hi kan hmachhawn ut ut reng mai.

Thingtlang khua min han lockdown meuh hi chuan, kan khawhawi hi a tawi tak mai a. Hapta khat baka ei tur chawhmeh leh chhungkaw pawipang, Sahbawn leh naute diaper takngial pawh lo nei thei  hi chu, eng chen pawh lockdown chhunzawm se, thlabi hlawh kiam chuang lo leh, a hunbi pangngaia dawng char charte bak va ni suh!! 

Mahni chuktuah huana thlai hnephnawl lo ching mi tlemte tih bak zawng hi chuan hapta khat a liam meuh hi chuan hmeh tur hi kan van riau tawh a. Dawr leh bazar hawn nikhuaa lei theih chi, Dailuah leh Sawrkar sarep (Neutrela) tih vel lah chu nitina inhlawhchawpa ei hmu hram hramte tan chuan Vana rah ang hlauh an ni si. Thingtlang khuate tana lockdown retheihthlakzia leh hrehawmzia hi sawifiah thiam mai chi a ni lo.

Khawpui, a bikin kan Aizawl-ahte chuan kawng hi a kaw nasa em em tih hi a chiang a. A mi chengte hrim hrim hi, nitina mahni tha ringa eizawng mi harsa tak tak hi, veng tinah hian inphum ve teuh tho mah ila, 70% zet hi mi hausa leh ngelnghet, sum tlakchham hlauhawm loh, eng chena rei pawh inkharkhip puang se tal buai lo tur hi an ni. 

Mi retheiho erawh chu, hapta khat lek lockdown a nih pawha leiba inchherchhuan nghal, a rulhna tur ngaihtuah chunga mahni chhungkaw ei tur pawh manganpui, Pa ber nih zahthlak khawpa fanau chawm harsa an awm nual. Chung mi harsa kan tihte chu mi hausa kianga awm, tam hlau lo In hnuai leh a tawpeng luahtute vek an ni.

Hetiang hi kan dinhmun mek a nih lai hian, thingtlang khaw thenkhat, Mizo nun ze mawi vawnghim a, harsate hmuh kan ngai lo leh, mahni neih ang angte ui lo leh phal taka pek chhuah duh khua kan lo la nei a, an fakawm tak zet. Heng khuate hian lockdown hi an hmang lo (inkharkhip lo) an ni bik lo va. Mite harsatna sutkiansak hi an nunpui a, an kristian hnan tlat a ni mai.

Dik taka sawi chuan, Aizawl khawpui chhunga khawi Veng mah hi, thingtlang khuate tanpui ngai khawpa rethei leh, mi hausa awm lohna Veng hi a awm hauh lo vang. Heng harsat mangan kan tawh hunah hian, midangte tana inpekna nun hi nunpui nise chu, Aizawl khawpui hian lockdown hi thingtlang khuate angin harsat chhan tur a nei ve lo.

Chutiang a nih laia thingtlang khaw rethei zawk, In 1000 em pawh ni lo khuaten, harsa leh rethei, hah thikula an thlawhma atanga Thosi leh Vaihmite, Vangvat leh Perhte kara an thar chhuahte Aizawl khawpuia an thawn luh a lo ngai ta si hi, a makin a rapthlak zawk hial a ni.

Aizawla chengte hian “Thingtlang khuate puih kan mamawh e,” an ti reng reng lo. Engatinge an puih tlat si? Eng dang a ni lo, a chhunga mi retheite hian thingtlangah chhungte an nei ve thim them vek a; social media a chak em em tawh a, engkim hi an inhrepawh vek a, thawn luh ngai niin an hria a ni mai. Engnge a chhan? Mi hausahoten an sum an thehchhuak lo a ni mai lo maw? 

Social media-ah hian... “Aizawl chumi Veng, khami Veng chu, an Veng chhunga Pa awmthei deuh deuh, chung mite leh chung  mite chuan sum thehchhuakin chawhmeh leh chhungkaw harsa zualte mamawh phuhrukna atan an thawhkhawm a. An Task Force leh YMA-ten ruahmanna siamin an fangkual a. Chhungkaw harsa leh ngaihtuahawm tumah an awm lo.... hapta lo awm leh turah pawh hetianga tih leh zel hi an tum mek....” tih thute hi han darh chuai chuai mai ta sela chuan, khawi thingtlang khuate mah hian harsa taka luanchhuah programme hi an duang lek lo vang le!!!!

Mi hausa uikawm te, suma riltam te, thinlung duham leh mahni chauha midang thih vek hnua la dam fal tum phet niawm taka khawvel hun hmang mekte hi, han harhchhuak thut mai se!!! An thih hunah an rosum cheng khat pawh an chhawm dawn lohzia te, he khawvela an dam chhunga thenawmte nena neih ang ang eizaho nawmzia te hi Chung lam khian an mumangahte tal rawn hrilh ta mai se. Aizawl khawpui nawmzia tur hi ka dawn phak lo. 

Hnathawk peih lo tanpui vak vak lam chu kan sawi lo. Nunphung pangngai khawvelin a zawh theih loh laia Covid hri veia thih mai hlauhawm khawpa hriselna pan ve tak takten an sumpai an roh bet tlat hi chu inngaihtuah harh mawlh teh se. Aizawl khawpuia kan mi hausaho, MLA din dawna Nuai za tel an neih ziak lut thei, thiante campaign-puina atana mamawh zah zah thehchhuak theite laitual lenna Zawlkhawpuiah hian engvang mahin thingtlang khuain an mamawh phuhruk turin ke an pen a ngai lo asin.

Aizawl khawpuiah kan cheng ve ang a, nitin inhlawhfa chawpin ei kan zawng ve ang a, tun ang harsatna hi a lo thleng ang tih hi ka hlau hnuhnawh lutuk. Kan thenawmte hausakzia te, an thiltihtheihzia te, In ropui tak tak an ngahzia te, a luah man ringawt pawha thlatina an sum lakluh tamzia te, lirthei an ngahzia te, an Motor hmaa V.I.P. designation plate zahawmzia te, Contract nuai sang tel man an thawh char char thin thu te chu thingtlanga chhungte leh thiante hnenah kan lo sawi rawtui ve hle si ang a!!!

Vawi khat dam lohna kan tawh tuma an motor hmanga Hospital thlenga min hruai thu te kha kan lo chapopui lek lek titih tawh si ang a. Tun ang hripui vanga manganna hunah hian an Inah pawh kan chuangkai leh ngam si lo ang a, phone lahin kan be ngam mumal dawn si lo ang a, engnge kan dinhmun tih pawh min rawn thlithlai leh si lovang tih hi a hlauhawm em mai!!!!

Lockdown hi chhunzawm leh a lo ngai palh thut a nih chuan, Aizawl khawpuia kan mi hausate u, inthingharh ula, in Veng chhunga sum ngahho kha intiamrual ula, mi harsa zawkte dinhmun kha ngaihtuahin han luangchhuak ve teh u. Thingtlang atanga puih ngai lo Veng in nih thute, in Veng huamah chhuanchham leh eibar kawnga harsatna tawk tumah an awm loh thute chhiar kan lo inring ang e.