Amah hi Champhai District, Khuangleng khua a ni.
A MA THUSAWI NGEI HI HAN CHHIAR VE TEH LE.
Kum tam tak liam ta 2006 ah class 12 zir zawh hlima doctor zir ve tuma entrance kan pek zawh hnu chuan. Mahni khaw lam panin ka haw ve ta a. Nipui alo thaw a, hlo thlawh hun a intan a thingtlangah chuan. Entrance result chu nghakhlel tak siin hriat hun a huphurhawm em em lawi si. Achhan chu, tlin loh chuan engtin nge hmalam hun tur kha ka hre bik silo.
Result chhuah ni chuan ka nu nen huanah vaimim hmun kan thlo a. Ni a sat em avangin thingbuk hnuai ah chuan ka lo muhil a. Ka harh hnu chuan, ka nuin a mumang a that thu min hrilh a. In kan haw chuan khua hi athim tan tawha. Ka inbual fel hnu chuan, Mizoram pumah pakhatna ka nih thu chu kan hre ve ta. Kan va han lawm ve tak em khami ni kha. A hlutna kha kan manpha lo mah zawkin ka hria. Ka nu hian a mumang kha ala hria em ka hrelo a, tun thleng hian zawh ka duha, mahse ka la zawt chhin lo. Ka duh tawk ka zir zo ta bawka, ka haw velah ka zawt ang.
Hun alo kal zel a…. hringnun chawhnu raih khawpa zan tam mut khamlo leh taksa leh rilru senga tha thlahloa kum 15 ka beihna alo ni ve ta reng mai.
Mahni degree neih te sawi chiam hi thil nuam pawh ani lo e. Amaherawh chu inthlahrung tak chungin, phulo inti leh insit tak chungin, doctor degree India rama kan neih theih level sang ber line pakhatah, mizo te zinga a hmasa ber niturin Nephrology ah a sakhming mawi ka tih em em mai ‘’Doctorate of Medicine (DM)’’Superspecialist degree chu ka hlawh chhuak ve thei ta. A reilo thei ang bera zir char char na chance nei vai thiam fal ho tan pawh kum 12 vel chu angai hrim hrim a. A kawng hi a thuiin a bumboha, a kar lakah zir tlawlh neuh neuh leh inhlawh pah, inbuatsaihpah chhung nen kum 15 lai ka seng anih ber chu. Vanna rah a ngai chung leh rim tina tinloh tur tawpa ka dahsan ni thin mahse, zir zir a entrance ah pawh tlinloh nawn awn awn hnuah pawh tih luih tlat chuan kan tling ve ta mai chauh kha ani a. AIIMS common entrance ah India ram puma kan inchuh General Quota seat 4 chiah awmkha tihpalh thilah kan eihek sak ve thei hram chauh kha ani a. Specialist zir zawha ka pass kan lawmnaah ka tlin hma chu vawi 20 tal ka beih tur thu kha ka sawi ve tawp a. Zir lo theilo dinhmunah ka insiam sa der kha ani a.
Zir reng renga hun hmangin, hringnun chhuk chho manlo leh perh thelh tam tak nei mah ila. Fel vang leh that vang niloa, thawhrimna ngaisang tu Pathian anih miau avangin, kan Pathian chuan kan dil ve te min pe a tun hun min hruai thleng hi ka lawm ve em a, ka lo tlak ve duah ani e.
‘’Doctorate of Medicine (DM)’’ bik hi Mizo te zingah pathum (3) chiahin an la hlawh chhuaka, damlai mi pahnih (2) chiah an awm zuia. A tlukpui MCh leh DNB superspecialist degree nei pawh mi tlemte chauh kan la awma. Thangthar te tan chonna lo ni se, kan mamawh tak tak zir kan la awmlohna ala tam mai a. Kan ram health care level sang zawka kan hruai ve theih nan theihtawp rawn chhuah turin ka sawm a che u.
Tun hun ka thlen theih nan a kil a lung tangkai tam tak an awma. Vawiin niah hian lawmthu ka sawi nawn leh duha. A hmasa berin ka Pa min boralsan tawh leh ka nu chungah ka lawm em em a. Ka u leh naute min support naah ka lawma. Pawl hniam ber atanga tun thlenga min zirtirtu te zawng zawng chungah lawmthu ka sawia. Min tawngtaisak thintu te chungah ka lawm em em bawk. A bik takin, ka Pa Sapchhawna leh Sir Zautea te nasa taka lehkha ka zirlaia min puih tawhnaah ah ka lawm takzet ani. Mi dang tamtak sawisenloh hnenah lawmthu sawina tur ka nei.
Ka trophy lak theih hnuhnun ber hi ka nu tan ka hlan e.
Ka lawm e
Post a Comment