- H.K.Lalsangzela.
Oil leh Natural Gas company te hi kan la hmelhriat tam awm lo ve. Engineering branch hrang hrang bakah Earth Science te leh subject dang tam tak kim taka an thawh ho na ti ila, kan sawi sual awm lo ve. Mizo te ngei pawh hi Oil industry a thawk an awm nual a, department hrang hrang a thawk an ni hlawm.
Petroleum Engineering bik hi tum tumah chuan zawhna leh chhanna hmanga rawn sawi zau kan tum a, min lo chhiar sak theuh dawn nia. A bik takin Engineering zir tum te tan.
1) Petroleum Engineering zir turin eng nge ngai ?
- A hmasa berin class 12 ah mathematics/ physics/ chemistry combination lak angaia. JEE clear ngei ngei a ngai. Tin, PCM ah average in 60% tal hmuh angai, (College tha a seat chang tur in)
2) State Quota a awm em ?
- Tunhma deuh kha chuan seat 1 a awm thin a; mahse Autonomous University an nih tak avangin Mizoram state quota chu tih bo a ni. Seat 1 chu min la zuah sak mah se, fee ah inhniamna a awm lo.
3) Petroleum Engineering college tha zual te leh admission an kalpui dan tlangpui.
- a) ISM, DHANBAD:
IIT an nih avangin leh India rama Petroleum Engineering college hmasa an nih avangin seat chan a har a. Tin, JEE Advance clear a ngai bawk. Placement leh zir zawm zel tum tan India ramah chuan duhthusam a ni.
b) UPES, Dehra Dun:
Hemi University hi Petroleum Energy zir bikna tura duan a ni a, ISM loah chuan zirlaite luh tumna a ni. Private a zir theihna a ni a, chutih rual erawh chuan anmahni hian Entrance hran te an buatsaih thin bawk.
c) PDPU, Gandhinagar:
College entrance hran bakah JEE tih that dan a zirin admission an ti thin. Mizote pawh tha takin an zu zir chhuak tawh a ni.
d) MIT,WPU :
Hemi college hi Mizoram in quota an neihna thin a ni a, tunah hian Mizo 2 an zir mek a ni. CET exam a ngai a, JEE marks nen an tihthat dan a zirin admission an ti thin. Hemi college pali -te hi India rama tha zual an ni a, hmun dangah pawh college a awm nual bawk.
4) FEE hi a to viau em ?
- A chunga kan sawi college ah khi chuan kum khatah 2-3 lakhs a ni tlangpui thin a, scholarship leh loan a tih theih avangin a to uchuak lo va; amaherawhchu, kum tin fees hi a danglam ve thin.
5) Kum engzat zir nge? Eng subject te nge kan zir dawn?
- Btech course hi kum 4 chhung zir tur a ni a. Kum 4 chhung hian exam pui (End semester) vawi 8 bakah project/ seminar/ internship/ mini-project/ presentation te bakah internal exam a awm nual bawk. Tin elective subject thlan tur a awm nual bawk ang
Petroleum engineering core subject : well engineering/ reservoir/ production/ geology/ logging/ HSE/ Mathematics/ Chemistry/ Equipment design/ EOR/ Refining etc .
6) Kum 4 chhungin kan thiam hman ang em?
(Hemi zawhna ka telhna chhan hi chu beidawng lova kan zir zel theih nan a ni)
- Zep lo ah chuan kum 4 chhungin kan hre thuak ang a, kan thiam chiang hman lovang. Amaherawh chu thiam emaw hriat hnem tluk a awm lo. Mahnia inzir peih hi a chhanna awlsam ber a ni.
7) Hna ka hmu ngei ngei ang em?
- Kum 4 na ah hian Campus ah company an rawn kal thin a, duh bik an nei thin a, class topper te ngei ngei pawh hna an offer ngai lo. Anmahni tana thawk thei tur mi an zawng thin.
8) Chuti chu tihthat kher a ngai lo a ni maw ?
- Damchhunga I degree neih tawh tur a ni a, zir that erawh a ngai viau. Chutih rual erawh chuan pakhatna I ni lo anih pawhin I theihtawp I chhuah chuan I lawm tho ang. Mahni phak tawka thaa tih a fuh ber.
9) Campus Placement hmu ngei ngei turin eng nge ka tih ang?
- A awlsam ber chu kum 4 chhungin theihtawp chhuah a, mahnia inchhiar belh. Hemi bakah hian zirtirtute nena inkungkaihna tha siam thiam a ngai. Communication skills lama mahnia inzir pawh a pawimawh khawp mai. Tin, Company a hnathawk tawhte nena inkawm pawh a tha khawp mai.
10) Campus placement hmu lo ila engtin nge hna ka zawn zel ang?
- Company te hian GATE Ranking atang hna an la thin a, kum tin vawi 1 exam a awm a, GATE ah 60 percentile tal kan hmuh theih chuan ST quota kan chang thei ang (A dil a zirin a danglam thin.)
11) Zir zawm duh ta ila?
- Mtech Petroleum Engineering zir theihna a awm nual a, GATE a I mark hmuh atang seat I zawn ve angai ang. College thenkhat – ISM/ IIT MADRAS/ PDPU/ RGPIT etc.
Tunah chuan a pawimawh ber I han sawi dawn teh ang.
Mizo te tan hian subject tha tak chu ni mah se, kan tum ber hna hmuh anih avangin zir turin kan duhsak lem lo. Oil company a luh duh hrim hrim tan chuan Engineering stream dang bakah Earth science tang pawhin a luh theih a. Petroleum Engineering erawh chu a mal em avang hian hna dang zawn nan a tangkai lem lo.
Nu leh pa ten in fate zir tura in duh pui anih chuan insen huam a ngai a, chu bakah Risk tak meuh meuh anih avangin rilru lam pawh inbuatsaih lawk a tha. Mizo zirtur Kan awm anih chuan tlang taka sawiin ka duhsak lemlo, hna hmuh loh palh ah stream danga hna zawn a rem ve vak lo.
إرسال تعليق