Ni 30.6.2021 zing dar 4:00 aṭanga ni 15.7.2021 zanlai dar 12:00 thlenga hman tur inkaihhruaina thar

Mizoram Sawrkar chuan ni 30.6.2021 zing dar 4:00 aṭanga ni 15.7.2021 zanlai dar 12:00 thlenga hman tur inkaihhruaina thar a tichhuak

DIPR Mizo Press Releases:   No.1178/2021-2022

Aizawl, the 29th June, 2021: Mizoram State Disaster Management Authority chuan inkhuahkhirhna kalpui mek chu tinep deuhvin, ṭul leh mamawh ṭhenkhat te hawn phalna Order No. ngai dated 18.6.2021 khan a lo chhuah tawh a.  Hun rei tak inkhuahkhirhna kalpui tawh a ni avangin mipui vantlang eizawnna nasa takin a nghawng a, zawi muanga ngai kan awh leh thuai theih nan thil ṭul ṭhenkhatte phal zau ṭha a ti a.  30.6.2021 zing dar 4:00 aṭanga ni 15.7.2021 zanlai dar 12:00 thlenga hman tur order leh inkaihhruaina thar vawiin tlai khan a ti chhuak a ni.

inkaihhruaina kimchang  PDF File (Mizo Version) i chhiar duh chuan hetah hian click rawh le)

NI 15.07.2021 THLENGA MIZORAM CHHUNGA COVID-19 DONA KALPUI DAN TUR INKHUAHKHIRHNA THUPEK

 

Mizoram chhunga COVID-19 dona atan hun rei tak chhung lockdown kalpui a ni tawh a. Heti chung hian hri kai thar tam tak an la awm zel a. Amaherawhchu, hri kai zat (positivity rate) chhutin inkhuahkhirhna kalpui mek hian nasa takin min veng a ni tih a lantir a ni. Chutihrualin, inkhuahkhirhna rei tak kalpui hian nitin kan ei leh bar zawn kawngah nasa taka nunphung a tihkhaihlak avangin, ei leh bar kawnga kan dinhmun a tlakhniam lutuk loh nan eizawnna hna ngaihtuah chunga inkhuahkhirhna kalpui chhunzawm tha tih a ni a. Chuvangin, Mizoram State Disaster Management Authority chuan inkaihhruaina Sawrkarin file No. B. 13021/101/2020-DMR/Vol-IV dt.18.06.2021 hmanga kalpui mek chu tidanglamin ni 30.06.2021 zing dar 04:00 atanga ni 15.07.2021 zan dar 12:00 thlenga hman turin COVID-19 inkaihhruaina thar a duang a ni. Hei hian COVID-19 chungchanga inkaihhruaina Order hmasa zawng zawng a luahlan (supersede) ang.
 

1. Mizorama lo luh chungchang
 

Mizorama lut turte reng reng chu Sawrkarin a hawn mek entry points kaltlang chauhvin an lut thei ang. Mizorama lo lut tur te chuan mPass-ah an in-register ngei tur a ni a. Entry point te leh Mizoram rawn luh theihna hmundang (Inter-State leh International border)-ah te chuan uluk takin Deputy Commissioner leh Superintendent of Police te ruahmanna angin Police leh VLTF te an duty ang.
 

1.1. Screening.

India ram pawn leh India ram hmun dang aṭanga Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga endik vek an ni ang a. RAgT positive te chu enkawl dan tur dinglai (Protocol) angin enkawl zui tur an ni ang. Hetiang hian Mizoram aṭanga zin chhuak, lo haw leh te pawh endik vek tur an ni ang.
 

1.2. Quarantine.

1) RAgT negative te chu fimkhur takin self-monitoring (mahni hriselna inchîk)- in mi dang nena in-contact lovin ni 10 chhung mahni inah (Home Quarantine) an inkhung hrang ang. Ni 10 hnuah RT-PCR/TrueNat test an nei ang a, negative result an neih chuan inkhung zui a ngai tawh lovang.

2) Home quarantine-a awm turte chuan inkhung hranna tur riahna (bedroom) leh inthiarna (attached toilet) hran an nei tur a ni. Chutiang ruahmanna neite chu an chhungkaw member te inkhung hran ve kher a ngai lo vang. Amaherawhchu, midangin an ṭawmpui loh tur riahna (bedroom) emaw inthiarna (attached toilet) hranpa nei lo home quarantine phalsak an nih erawh chuan an chhungkaw member te pawh pâwn chhuak lo leh midang nen inkalpawh lovin ni 10 chhung an inkhung tur a ni.

3) Home quarantine-a awmna tur, hmunhma (facility) nei lote chu hotel (paid quarantine) emaw Community/ Government Quarantine Facility (CQF/ GQF)-ah anmahni sensovin ni 10 chhung an inkhung hrang ang. Quarantine facility-a awmte pawh quarantine facility an chhuahsan hmain RT-PCR/TrueNat hmanga test an ni ang.

4) Home quarantine leh quarantine facility-a awm ten Health & Family Welfare Department-in zawm tur inkaihhruaina a siamte chu an zawm ngei tur a ni. Chung inkaihhruainate chu an zawm ngei a ni tih an awmna veng LLTF/VLTF ten an endik (monitor) ang.

5) Hun rei lote chhung (short stay), darkar 96 aia rei lo Mizorama cham tura lokal te chuan entry point an lo thlen hmâ darkar 72 aia hlui lo RT- PCR/TrueNAT/CBNAT (ICMR recognized laboratory) hmanga COVID-19 test negative result (SRF ID awm) an neih a, entry point-ah RAgT negative result an neih bawk chuan inkhung hran a ngai lovang. Anmahni chah chhuaktu/buaipuitu ten an tana hmun ruat bikah dahin fimkhur takin an tih tur bik an tihpui ang a, midang nena in-contact lo thei tur ang berin ruahmanna an siam ang.

6) State pawn aṭanga thlawhnaa lo lutte chu Transport Department-in empanelled vehicle, Order No.G.28016/2/2020-TRP dt.16.04.2021-a a tarlan ten an phur thei ang a, mahni motor hmanga zin haw phurtute chuan an passenger-te nena in-contact lo thei tur ang berin fimkhur takin ruahmanna an siam ang. Kalkawngah pawh midang nena in-contact tura din khawmuan loh tur a ni. Tin, motor hmanga Mizoram lo lut te leh Aizawl pela district danga kal turte chu an motor hmanlai hmangin, hmundanga chawl lovin, an in-quarantine na hmun tur an pan nghal tur a ni. Amaherawhchu, remchan lohna avanga motor thlak a ngai a nih chuan mahni private motor uluk taka daidanna siamin emaw Transport Department empanelled motor te chauh hmangin an kal chhunzawm tur a ni.

7) State pawn aṭanga thlawhna emaw lirthei emaw a lo lut te hianClauseA.5-in a phut ang a VLTF/LLTF te hriatpuina lehkha lak ve kher a ngai lo vang. Mizoram an luhna atana mPass-a an in register-na chu an thlenna tur (destination) thlen nan chauh hman phal/theih a ni a, hmundang kalkual/tlawhkual nan mPass chu hman phal a ni lo. Amaherawhchu, an lo thlen hma-in an veng/khua LLTF/VLTF te an hriattir lawk ang.

8) Screening leh quarantine dan tur fel taka ruahman a nih theih nan Mizoram an rawn luh hmain mCOVID-19 mobile application mPASS-flight emaw mPASS-road hmangin an in-register lawk tur a ni. Home quarantine leh Hotel quarantine dil duh tan online-in mcovid19.mizoram.gov.in-ah a dil theih tawh bawk.

9) Mizoram-a lo lut te quarantine dan,COVID-l9 testing, quarantine mêk leh hri vei (asymptomatic, mild leh severe case)-te enkawl chungchang, COVID Care Centre, Dedicated COVID Health Centre leh Dedicated COVID Hospital te kalpui dan chungchangah Health & Family Welfare Department-in inkaihhruaina a siamte chu khauh taka kalpui tur a ni ang. Tin, quarantine-a awm/ thlen man, ei leh in man leh test-na man pek dan tur erawh chu Notification No.B.13021/187/2020-DMR/Vol-I dated 26.04.2021 leh 05.05.2021 ten a tarlan angin kalpui a ni ang.
 

1.3. Testing.

H&FW Department-in order an chhuah anga kalpui tur a ni ang.
 

1.4. Isolation.

1) Mizorama lo lut entry point-a positive hmuh chhuah te leh hmun danga positive hmuh chhuah te reng reng chu an hriselna dinhmun ngun taka en an ni ang a, symptoms nei lo (asymptomatic) leh hrisel lohna dang nei lo, chhungkaw member dangte nena intlawhpawh lova inkhung hran theihna bedroom leh inthiarna hranpa neite chu mahni inah (home isolation-in) inenkawlin an inkhung hrang ang.

2) In lama inenkawl (home isolation) te hian Health & Family Welfare Department-in zawm tur inkaihhruaina a siamte chu an zawm ngei tur a ni. Chung inkaihhruainate chu an zawm ngei a ni tih an awmna veng LLTF/VLTF ten an endik (monitor) ang.

3) Home isolation-a awmte chu Health & Family Welfare Department-in uluk takin an vil zui ang.

4) In lama inenkawlte hian hriselna chungchangah harsatna an nei a nih chuan COVID-19 (Medical) helpline number (Toll free 102, landline 0389- 2323336, 0389-2322336 leh 0389-2318336)-ah telephone-in an harsatnate an thlen thei ang.
 

2. Containment Zones

A ṭul a nih chuan Deputy Commissioner ten an District chhungah Containment Zone an puang thei ang a, Containment Zone puanah te chuan Deputy Commissioner-in thupek a siamte khauh taka zawm tur a ni ang. A ṭul dan azirin colony/ building/ apartment chauh huam te pawhin Micro Containment Zone puan theih a ni.

3. Bungraw Chawkluh Leh State chhunga Thiar Chungchang

1) State pawn aṭanga bungraw lakluh nan phalna hranpa lak ngai lovin lakluh theih a ni ang. Amaherawhchu, mCOVID-19-ah an in-register vek tur a ni.

2) Bungraw lak luh phurtute (driver leh handyman) hi entry point-ah uluk taka screening neih chhunzawm zel tur an ni ang. Screening neih laia symptoms neite chu RAgT hmanga endik an ni ang. Tin, bungraw phur motor-ah reng reng hian midang (passenger) an chuang tur a ni lo.

3) State pawn aṭanga bungraw lak luh phurtute (driver leh handyman) te chu an kalphung pangngai angin khaw dâiah anmahniin eirawng an inbawl chawp ang a, khawchhungah midang nen inchiahpiah lovin an bungrua an unload zawh veleh an let leh nghal ang. An bungrua unload chhung hian midang te aṭanga feet ruk (6) tala hla-ah an awm tur a ni.

4) State pawn aṭanga bungraw lak luh phurtute (driver leh handyman) te chu backload lak tur zawngin Mizoram hmun dangah an kal kual tur a ni lo.

5) AMC Area pawnah chuan Mizoram-a bungraw awmsa emaw siam chhuah/tharte thiar chungchangah inkhuahkhirhna a awm lo vang.

6)A chunga tarlan driver leh handyman-te hian kawng laka harsatna an tawh thulhah State Control Room (Toll free 1070, landline 0389-2342520, mobile 7628072785 and whatsapp 9366331931) leh COVID-19 (Medical) helpline number (Toll free 102, landline 0389- 2323336, 0389-2322336 leh 0389-2318336)-ah telephone-in an harsatnate an thlen thei ang. Heng number te hi motor lo lut driver leh handyman ten awlsam taka an hmuh mai theih turin Screening Point-ah langsar deuhva tar tur a ni.
 

4. Zin Veivah Chungchang

1) Chhiat tawh, damloh leh tul bik thila zin veivah tul tan an awmna LLTF/VLTF te hriatpuina lehkha kengin an zin veivak thei ang. Hetiang hriatpuina lehkha neite zin nan hian mimal lirthei leh Mizoram chhung khaw kar kawnga passenger phur lirthei (commercial passenger vehicle) te hman phal a ni.

2) Sawrkar hna (Official Duty)-a sawrkar hnathawk zin chhuak leh lut tur ten LLTF/VLTF te phalna lak a ngai lo vang. Amaherawhchu, an Identity Card leh transfer order/ detailment order Police/COVID-19 Executive/ LLTF/ VLTF Duty te enfiah turin an keng ngei tur a ni.

3) Lirtheiah te hian registration-a seating capacity tarlan bak chuan phal a ni lo. Lirthei khalhtute leh an phurh ten mask/hmai tuamna an vuah vek tur a ni. Passenger-te hman tur hand sanitizer an pai reng tur a ni. A tul dan azirin Deputy Commissioner ten an district huam chhungah inkaihhruaina chipchiar an siam thei ang.
 

5.Mipui Vantlang Tana Inkhuahkhirhna Dangte

1) Hemi hunchhung hian eizawnna leh tul bik thil nilova veivah leh inlenpawh khap tlat a ni. Office kai tur leh phalna neite bak chu tumahin mahni in/ compound an chhuahsan tur a ni lova, building khata in hrang hrang luahte pawh intlawhpawh loh tur a ni.

2) Ṭul bik thila pawn chhuak tur reng reng chuan (facemask leh hmanraw dang hmangin) hmai an tuam ngei tur a ni. COVID-19 hri len tamna veng/ khua-a veivah ṭulna a awm chuan, a theih chen chenah chhungkaw member zinga COVID-19 vaccine la tawhte zel chauh chhuahvah tur a ni.

3) Vantlang hmuna kal te chu feet 6 tala inhlata awm tur a ni.

4) Dawr leh bazar hawn chungchangah vawi khata mipui tam tak pungkhawm tur ven nan VLTF ten ruahmanna an siam ang.

5) Eizawnna leh hmasawnna hnathawh chungchangah CAB uluk taka zawm chungin kalpui tur a ni.

6) He inkhuahkhirhna thupek kalpui chungchangah hian LLTF/VLTF te chuan an khua/veng chhung ṭheuhvah COVID-19 do nana an hmalaknate an chhunzawm zel ang.

7) Hemi hun chhung hian lirthei a veivah khap tlat a ni. Amaherawhchu, hei hian annexure a activities/hnathawh phal tarlan te leh a hmuna thawk te chet velna lirthei a huam lovang.

8) District Magistrate ten zan curfew (7:00 PM to 4:00 AM) an puang ang a, CrPC Section 144 hmangin Order an chhuah ang.

 

6. Phalna Nena Kalpui Tur Thila Inkhuahkhirhna te

Inkhuahkhirh hun chhung atan hian Mizoram chu hmun (category) thumah then a ni a. Chung te chu 1) AMC area, 2) District Headquarters leh 3) khaw dang zawngte (others) an ni ang a. Heng hmuna hna leh hmalakna (activities) kalpui phal te chu Annexure-III ah tarlan a ni a. Phalna neia kalpui ah hian heng te hi zawm ngei tur a ni:

1) Dawr nghaktu leh hnathawktu te chu vaccine dose khat tal la tawh an ni ngei tur a ni. Vaccine an la tawh a ni tih finfiahna (proof) an kawl tur a ni a, hei hi LLTF/VLTF/Police/ Executive Duty ten an check thin ang.

2) Thlai/chawhmeh bazar kalte thawl tak leh midang nena inhnaih lova an bazar theih nan chawhmeh zuartu te ṭhutna inkarah feet 6 tal hmun awl an zuah zel tur a ni.

3) Veng danga dawr/mimal sumdawnna (private-owned company/office) pan turte chuan an chenna veng LLTF/VLTF te ziaka phalna (movement permit) an keng ngei tur a ni.

4) Annexure-III a office/dawr/sumdawnna, adt. hawn phal te hian an inhawn theih hun chhung bituk te hi tha takin an zawm tur a ni.

5) Commercial passenger vehicle (bus, taxi, maxicab etc.) te chuan an motor-ah hand sanitizer an pai reng tur a ni a, Driver leh passenger ten face mask an vuah ngei bawk tur a ni. Seating capacity aia tam chuan phal a ni lo. Commercial vehicle khalhtute leh conductor-te hi vaccine dose khat tal la tawh an ni ngei tur a ni. Vaccine an la tawh a ni tih finfiahna (proof) an kawl tur a ni a, hei hi LLTF/VLTF/Police/ Executive Duty ten an check thin ang.
 

7. Sawrkar Office

1) Mizoram Sawrkar hnuaia office te chu Annexure-III a tarlan angin an kal ang.

2) Sawrkar hnathawk leh sawrkar sum aṭanga hlawh la te chu COVID-19 duty turin a ṭulna apiangah hman an ni ang.

3) Mizoram Legislative Assembly te chuan an kal dan tur a hranpain an ruahman ang.

4) High Court thuchhuak angin Judiciary/Court-a hnathawkte chu an kal ang.

5) Central Govt. office leh organization te chu “COVID-19 Appropriate Behaviour” khauh taka zawm chungin office an kal ang.

6) Office kai tur ten Identity Card emaw Detailment Order an keng ang.

7) Head of Department/Office tin te chu office vawn fai leh tih thianghlim kawngah mawhphurtu an ni ang a, office-ah kut silna hmanrua (tui, sahbawn/handwash) emaw hand sanitizer an buatsaih ngei ngei tur ani.

8) Ṭul bikah lo chuan meeting neih loh tur a ni. Inrawn leh inbiak a ṭul a nih pawhin a theih chin chinah intercom, landline telephone leh mobile emaw IT application (WhatsApp, E-mail, etc) hman ṭangkai hram tur a ni.

9) Department emaw office dangte nena indawr ṭulna thilah chuan email emaw electronic media dang hman hram tum tur a ni.

10) Mipuiin Sorkar Department te ral khat aṭanga an dawr theihna-ah Department tinin Information Technology an hmang ṭangkai tur a ni.
 

8. COVID Appropriate Behaviour (CAB):

Covid-19 hri laka kan himna tur atan mitin hian tih tur pawimawh tak kan nei ṭheuh va. Chung tih tur leh zawm tur CAB te chu Annexure-I & II-ah tarlan a ni a, mitinin zawm ṭheuh tur a ni.
 

9. AMC Area Pawn Lama Inkhuahkhirhna Chungchang

AMC Area huam chin pawn lamah chuan Deputy Commissioner/ DDMA ten an District dinhmun te uluk taka zirchiangin an District chhungah inkhuahkirhna siamin an kalpui ang. Deputy Commissioner te hian anmahni District chhung leh area/khua te dinhmun uluk takin an thlithlai ang a, COVID-19 venna atana tul apiangah ruahmanna siamin inkhuahkhirhna an kalpui ang.
 

10. Veng/Khaw Bil Inkhuahkhirhna

1) He order/inkaihhruainain a huam baka veng bil bik tana inkhuahkhirhna khauh zawk neih tul tihna a awm chuan, a chhan leh vang chiang taka ziakin LLTF/VLTF ten an awmna District Deputy Commissioner hnenah rawtna an siam thei ang.

2)LLTF/VLTF ten he Order-ina inkhuahkhirhna a siam bak pelin anmahni thuin veng/khua bil inkhuahkhirhna hranpa/ curfew/ lockdown/ Containment Area/ Restricted Area an puang tur a ni lo. Tin, kawngpuiin a paltlang khua ten an khaw kaltlanga khaw danga kal tur zin veivak te leh an lirthei an dang tur a ni lo.
 

11. Hremna Dan

He thupek zawm lo chu Disaster Management Act, 2005, Section 51 aṭanga 60, the Mizoram (Containment & Prevention of the spread of COVID- 19) Act, 2020 leh IPC Section 188 hmangin hrem theih an ni.