Aizawl, the 21st July 2021 : Joint Director (Food & Drugs), Deputy Commissioner of Food Safety ni bawk, Directorate of Health Services chuan a hnuai ami ang vawiin khan thuchhuah a siam.
Packaged Drinking Water (ZoAqua) ţha lo tunhnaiah hmuhchhuah a awm a, mit lawnga hmuh theihin a nawi tam tak a awm a ni. Hei hi Social Media-ah hmuh theihin theh darh a ni a, a siamtute pawhin Social Media-ah vêk thupha chawina an chhuah hmuh zui a ni bawk.
Hemi chungchang hi FDA Mizoram chuan a chhuizui nghal a. ZoAqua Packaged Drinking Water siamtu MZ Agencies, Sihhmui hi an FSSAI licence a thih hnuah renew a ni lo va. FSSAI licence renew turin Bureau Of Indian Standard (BIS) certificate an renew a ngai a, chu pawh chu an renew lo bawk a ni. Food Safety & Standard Act, 2006 and Rules/Regulations angin, valid FSSAI licence leh BIS Certification nei lovin Packaged Drinking Water siamchhuah theih a ni lo.
Hetiang a nih avang hian MZ Agencies, Sihhmui hi Packaged Drinking Water siam thei an ni lo va. Social Media lama April 2021 a an siama thil thleng palh anga an sawi pawh hi, an licence a thih hnu daih a nih avangin dan bawhchhiain an siam tihna a ni.
April 2021 hnu lamah erawh an siam zawm ta lo va, an licence renew a nih hma chuan an siam zui tawh tur a ni lo bawk. An siamsa bazara la awm, December 2020 hnu lama siam zawng zawngte chu MZ Agencies hian a lalet leh vek tur a ni a. Zawrh tura dawra la kawl zawng zawngte pawhin an lakna kaltlang zelin an thawnkir leh vek tur a ni.
Source :
إرسال تعليق