PNEUMONIA LAKA INVENNA-PNEUMOCOCCAL CONJUGATE VACCINE CHU MIZORAM AH A THLAWN A PEK TAN THEIH TURIN HEALTH MINISTER IN A HAWNG
No.785/2021-2022
Aizawl the 2nd June, 2021 : Health Minister Dr.R.Lalthangliana chuan vawiin khan Mizoram pum-a hman tan tur leh Routine Immunisation – natna hrang hrang laka invenna a thlawn a chi 9 sawrkarin a pek mek belhchhahna tur
Pneumococcal Conjugate Vaccine(PCV) - Pneumonia laka invenna vaccine chu a hawng.
Minister chuan PCV hi Mizoram-ah ngei pawh a thlawn a dawn theih a ni dawn ta chu lawmawm a ti a, hemi tihlawhtling tura Sawrkar laipuiin leh Mizoram sawrkar hmalaknaah lawmthu a sawi a. Mipuite pawhin PCV hi kan ngaihhlut a, hri laka invenna awm thei ang ang lak ngei ngaihpawimawh nachang kan hriat a tul hle a ni tiin a sawi.
Natna hrang hrang laka kan him theih nan Universal Immunisation Programme (UIP) hnuaia vaccine hrang hrangte hi kan tu leh fate lak tir theuh turin mipuite Minister chuan a ngen tak meuh a ni.
He Vaccine thar - PCV hi hetiang hian lak tur a ni ang.
1) Naute thla 1 ½ a tlin in lak tan tur a ni
2) Thla 3 ½ ah a vawi 2-na lak leh tur.
3) A vawi 3-na atan naute in thla 9 a tlin hunah lak leh tur a ni.
India sawrkar chuan kum 1985 khan Universal Immunization Programme hi a din a, khawvel pum a Immunization programme lian ber a ni.Sawrkar laipui chuan Universal Immunisation Programme (UIP) chu tilian zelin vaccine thar te pek belh zel a ni a. He Programme hmang hian Mizoram ah pawh Vaccine (hridanna) hi chi hrang hrang 9 - Tuberculosis (TB), Zenghri, Hepatitis B, Khawthalo, Diptheria, Pertusis (Khuh Hip), Tetanus, Haemophillus Influenzae type B, Measles leh Rubella te pek mek a niin vawin atang chuan Pneumococcal Conjugate Vaccine (PCV) belh alo ni takah chuan chi 10 lai kan lo nei dawn ta a ni.
Pneumonia hi natna hrik hrang hrang in a thlen theih natna a ni a, chung zingah chuan Pneumoccus natna hrik te hi naupang kum 5 hnuailam ah Pneumonia avanga damlohna leh thihna thlentu tam ber an ni a, chuvang chuan he natna laka invenna tha tak leh pawimawh tak a ni. He vaccine hian Pneumonia zawng zawng lakah naupang chu venghim lo mah se, pneumonia thlentu tam ber lakah hian a veng dawn a ni.
Written by: Dr. Saithantluangi Zote, MIS, IPRODated: 2nd Jun 21 4:07 PM
إرسال تعليق