SOCIAL MEDIA MAWHPHURHNA

Covid-19 chungchangah thu leng vak a tam em em mai a. A bik takin social mediaah a ni a. Mi nghet lo tan chuan chi-ai mai theihna a tam hle awm e. Nimin te pawh khan “Urgent Announcement, Third Wave to hit India’ tih chu thehdarh chiam a ni a. Mizo tawnga letlingin “Third Wade-in India a tuam tan” tiin theh darh a ni a. Hetiang taka chiang, Third Wave chu lo thleng ngei ngei tur anga sawi hi a dik hlel a, Third Wave chu lo thleng mai theia rin chauh a la ni. A lo thlen hun tur pawh rin thu vek a la ni a, tumahin a hun dik tak an la sawi thei lo.

 Third Wave chuan naupang lam nghawng nasa tura sawi than vak vak a ni a, mahse, hengte pawh hi tute emaw rin thu mai a la ni. Engmah finfiahna evidence, data, study, etc. rintlak tak tak a la awm lo a ni.

 Mi thenkhat chuan Vaccine te pawh hlauh an inzirtir emaw tih turin thu tam tak thehdarh a ni a, mahse, khawvelah vaccine la an tam tawh hle a, vaccine lak avanga thi an ni tih finfiahna tak tak a la awm lo a ni. 

 Mizoramah pawh khawchhak lung lum hlau te an awm a, thim thuah hnih te pawh thenkhat chuan tu tute emaw, eng eng emaw an bel a, rinthu mai mai a ni a. Thenkhatten UID te an lo hlau bawk a.

 Hmanni lawk khan Union Health Ministry chuan State leh UT media professionals/Health Correspondents  tan Capacity Building Workshop an buatsaih a, Health Journalist 300 chuang leh state leh UT hrang hranga DD News, AIR, PIB senior official-te an tel a. Chuta an sawi pawimawh tak chu  Covid-19 chungchanga thil finfiahna awm si lo, thu vuk vuk  (myths) changchawi te, vaccine leh vaccination chungchanga thu belh chian dawl lo thehdarhna laka inthiarfihlim turtein journalist-te chu fuih leh mipuite hnena zirtirna dik leh chhutchian dawl thehdarh tura chah an ni a. Fake news/myth te counter tura chah an ni bawk a ni.

 Mizoramah pawh journalist an tam ta hle a. Social media, whatsapp leh facebook-ahte a tel thei apui an tam ta. Chanchin thar put darh leh thehdarhte chu thiamna bik nei nih loh pawhin experience te neih a ngai a. Tin, mawhphurhna a keng bawk a ni. Chutiang a nih laiin, eng thu mai pawh, mahni hriat mai duh tawk lo leh a dik leh dik lohah finfiahna tur zawn aiin thehdarh lama chak tak tak an tam hlein a lang a ni.

 

 Sawrkar leh thuneitute lahin social media chu thu thedarhna atana rintlak berah an ngai ta emaw tih mai tur a ni a. Sawrkar thu chhuak a bik takin journalist-te hnen chauha thleng tur press release te, press statement, etc. te chu a thehdarh nan social media chu an hmang ta ber emaw tih mai tur a ni.

 A bik takin tun lai Covid-19 boruakah hian chuan awi tur leh pawm tlak chu sawrkar thu chhuak niin a lang. Chu chu Covid-Appropriate Behaviour zawm tur tih te, vaccine a hlauhawm lo tih te, vaccine lak hma theih apiang a tha tihte a ni a.  Thil lo thleng tur hrilhlawkna lam chu a tlangpuiin innghahna tlak a tam lo hle a ni. 

 Sawi tak angin Third Wave a lo thleng ta nia sawite chu thu vuk vuk a ni a, Vaccine hlauh te pawh mite aia dawihzep bik nihna a ni. Mi vaibelchhe tamin an la tawh a. Khawvelin a dampui mek a ni. Social media a ni emaw media-te chuan social responsibilty an nei a, an hna chu mite tihlau tur ni lovin thu tak hrilh a, zirtir (educate) a ni. 

(MIZO AW Editorial dt. 28.6.2021)