Thingsulthliah

 Thingsulthliah

- Joseph Lalnunmawia

Zoram khaw hming zawng zinga mawi bera thlan hi a hming chang a lo mawi lo e; an thiltih hi kan tan a va mawi em! Hripui a leng a, kan thu hriat ngaih loh Task Force, quarantine, Home isolation tih te chu keini ang duang pawhin thiam leh thiam loin kan lam ri ve ta sek mai a.

Kum 2021 a lo her chhuak a, a ziaawm deuh tawh ang chu tih kan beisei laiin hri avanga thihna a lo thleng ta hial zawk a! Keini veng pawhin kan lungduh, kan la duhlai ngawih ngawih mi pali lai kan chân ta... Hun engemaw chen phei chu hri avanga thi tam ber veng kan ni lehnghal a, topper nih dan lungchhiatthlak tak a ni.

Ti hian kan chhuan em em kan khawpui ber pawh fanghmir bu thai darhsak ang maiin kan buai ta nuai nuai a. Zirna in leh pisa kai dan thlengin a mumal thei ta lo.Biak in dãr ri a reh a, inkhawm khuang ri hriat tur a awm ta hek lo. Kan thawm hriat zin ber pawh pâwn chhuah loh tur thu leh ṭul bika pãwn chhuakte pawhin uluk taka hmai tuam a, uluk taka kut sil fai fo a ngaih thu te a ni ta.

Chu hrehawmna chhum zîng chuan veng tin a zìn hnan a. Keini vêngah pawh a khat tawkin chhuak thei loa inkhung chhungkaw engemaw zat an awm ta reng mai. Chung mite chu LTF hmangin han inṭanpui ṭhin mah i la, tuk zana chawhmeh intumsak reng sèn rual a ni lo.

Ṭhenrual ṭha, ṭhenawm khawveng leh LTF aṭanga an dawn chhun chhun chu lungawi taka an ei a ngai a. Hmangaihtu an mamawh lai ber a ni."Engkim tan hian hun ruat a awm a" tih dikna turin he hun thimin kan vêng a tuam lai tak hian khaw hming mawi ber mai Thingsulthliah khua chu an rawn che chhuak ta a.

Chhuak thei loa inkhung kan venga chhungkaw tam tak, chawhmeh ngai hlir ning lutuka thlè thle te chuan thlai tharlam leh itawm tak tak an dawng ta ruih ruih mai. Thingsulthliah vanga kan lawmna nî a lo thleng a ni.Thliah hnu chhâwl a ûai a nih pawhin Thingsül meuh zawng, thliah hnu pawhin a lo la pâr mawi mang e.

Kan lawmna hian Tuirial kän se, Seling pèlin "Sül khaw hming mawi" thleng chho mawlh rawh se.