Dr. P. Venu Gopala Reddy hi P. Vengala Reddy leh P. Sai Lakshmi te fapa naupang zawk a ni a, amah hi tlangval a la ni. A u Kishore Reddy hian nupui neiin fapa pakhat an nei tawh a, Hyderabad ah an cheng mek a ni. A pa P. Vengala Reddy hi Andhra Pradesh a Sawrkar School ah a thawk mek bawk. Dr. Venu hian Narayana Medical College, Nellore, Andhra Pradesh ah Kum 2008 khan merit quota in MBBS a zawm a, kum 2014 ah a zir zo a ni. Kum 2015 ah merit quota bawkin DNB (Diplomate of the National Board in General Surgery) zir turin a tling leh a, April ni 4, 2015 khan Aizawl Civil Hospital ah a zawm a, Dr. Saia Chenkual, Dr. Zothana, Dr. Ruatfela leh Dr. Thomas Zomuana te hnuaiah training neiin, May ni 30, 2018 khan DNB (Diplomate of the National Board in General Surgery) tha takin a zo leh a ni. DNB (Diplomate of the National Board in General Surgery) a zir zawh hnu hian an khaw lamah a haw thla a. Nimahsela, Mizoram chu nuam a tih avangin July, 2018 ah lo let lehin, Aizawl Hospital leh Ebenezer Medical Center ah Mizo Senior Surgeon ho hnuai ah a thawk leh a ni. Tichuan, ZMC hi March, 2019 ah a zawm a, January ni 30, 2020 khan ZMC ah tho Mizoram Sawrkar hnuaia thawk turin lak a ni ta a ni.
“Kristiana inlet tur hian tumahin min nawr lui lo a, ngun taka ka ngaihtuah hnuin ka duhthlanna ngeiin Kristian ah hian ka inlet a ni. Ka nu leh ka pa te ka hrilh lo a, an la hre ve mai turah ka ngai,” tiin Dr. Venu hian a sawi a. “Hindu chhungkuaa seilian ka ni a, kum 2015 hma lam kha chuan Hindu sakhuaah hian ka ruh ve hle. Nimahsela, Mizorama ka lo awm hnu hian Kristian nun tak tak ka thiante nunah ka hmu a ni. Pu Chawngkunga, Dawrpui vengthar te hi Mizorama ka nu leh pa atana Pathian min pek an ni a, anni chhungkaw zingah hian ka tal tam hle a, an chhung inkhawmah te ka tel ve thin bawk a, an chhungkaw nun atang hian Kristian nun tam tak ka zir chhuak a ni,” tiin a sawi bawk.
Thla hnih liamta ah khan Dr. Venu hian a thinlungah Baptisma chan a, Kristiana inpek duhna lian tak a nei tan a, Pu Chawngkunga te chhungkua, Dawrpui Vengthara cheng te nen sawihoin Baptisma chan dan tur chu an ngaihtuah ho a, ni 30 June, 2021 khan hrileng karah ruahmanna felfai tak hnuaiah mi tlemte tel in Rev. B. Zohmangaiha’n Dawrpui Vengthar Presbyterian Biak inah Baptisma a chantir ta a ni.
“Kristiana ka inpek chhan hi mi thenkhat chuan mizo hmeichhia nupuia ka neih duh vangah an ngai a, mahse hei hi a dik lo hul hual a ni. Tun dinhmunah chuan zir tur leh hnathawh tur tam tak ka la neih avangin nupui nei thei dinhmunah pawh ka la ding lo hrim hrim a ni,” tiin Dr. Venu hian a sawi a. “Tin, ka chhungte bul hnaia a awm loh avanga kristiana inlet theia min ngai te pawh an awm bawk a, heipawh hi a diklo a ni. Kristiana ka inleh avang hian kan thisen inzawmna a chat tihna a ni lo a, engtikniah emaw chuan ka thutlukna hi an la pawm ve ngei ang,” tiin a sawi chhunzawm bawk. Kristiana ka inleh a, Lal Isua Krista Lal leh chhandamtua ka pawm chuan nun hlimna thuk tak ka nei ang tih hi ka ring tlat a, chuvanga Baptisma chang ka ni e, Lal Isua hi ka ring a, ka zui zel bawk ang a ti a ni.
(Dr. Venu Kristian ah a inlet a ni tih kan hriat khan keini Christian Oulook te chuan amah ngei biak tha niin kan hria a, amah biak dan kan ngaihtuah a, hun remchang min lo siam sak thei hlauh a, kan lawm hle a ni)
إرسال تعليق