Engvangin nge naute an tah?

 Naute te hian tah (cry) hi an rilru sawichhuah nan an hmang a; chung zinga a chhan langsar zual deuh deuhte chu an riltam (hunger) vangte , na (pain) an neih vangte, an thinrim (anger) vangte leh hlauhna (fear) an neih vangte an ni tih mi thiamte’n an hmuchhuak. Mahse nu leh pa, a tam zawk chu fa hmasa ber pawm te, hian naute a tah hian eng ber nge a tah chhan tih hriat tumin an bei fe thin a ni.

 Spanish Journal of Psychology-a zirchianna pakhat an ziah lanah chuan an mitmeng awmdan leh an taha an awrawl atangin a chhan awm ang deuhte chu a hriat theih niin an sawi. Dr. Mariano Chóliz chuan heti hian a sawi a: “Naute te hi thinrim emaw hlauh emaw avanga an tah hian an meng a, na an tawrh avanga an tah hian an mit an chhing”, tiin.

 Thinrim vanga tap an nih chuan an tap rawlin zawih lam a pan a, mahse hlauh vang emaw na tawrh vang emaw a an tah chuan an tap ring telh telh thin tia sawiin, Dr. Chóliv-I chuan: “Tah hi naute tan chuan a duhlohzawng sawichhuahna ve ber a ni a, a tam za wkah chuan an sawi chhuahna awm chhun pawh a ni”, a ti. Dr. Chóliv leh a pawlte hian naute sawmhnih rual, thla thum atanga thla 18 inkar a upa te chu an tah hrat dan leh an nu leh pa te lo dawnsawn dan nen an zirchiang a ni.

Thinrimna leh hlauhna hi hriat hran har ber an ni a, mahse Dr. Chóliv chuan heti hian a ti: “A enthlatute’n thinrimna leh hlauhna hi na tuar tap lakah hriat hran  har ti viau mahse, na an tawrh avanga naute an tah hi chuan an tap nasa bik a, a dawngsawngtu tan pawh rilru a la bik a ni.” Na tawrh vanga tah hi hriat a awl ber a, a chhan ni thei deuh chu taksa leh hriselna tina theitu lak atanga invengthawng tura hriattirna, naute enkawltu tan pawha rang taka chet theihna tur khawp a nih vang niin a lang.

Naute a tah hian, a chal a tawm nasat danah te, a mithmul (eyebrows), ka (mouth) leh hmui (lips) a tihchet danah te hian hmai tihrawl (facial muscles) vel a che nasa hle tih a hriat theih. Mithiamte chuan heng na (pain), hlauhna leh thinrimna te azir hian hmai tihrawlte hi an chet dan a dang tih an hmu.

 Thinrim vanga tap an nih chuan naute te hi an mit chhing chiahlo in a chanve in an meng a (eyes half-closed), an en zawn an en ngar ngar a nih loh chuan khawimah an en zawnlo. Na an tawrh chuan an ka chu a pangngai in emaw, a chanve vel chauhin emaw a zau in an ang a, an tap ring tual tual thin. Hlauh avanga tap an nih chuan khap mang meuhlo in meng chungin an tap thin.

 Saktea Tlau