Mahse hrileng kan dem dawn chuan kar lehah ziaawm lam a pan loh chuan kan tihdan pangngai angin lockdown an chhunzawm leh ang a, chhuah phal hun an hawng a nih pawhin inchuh luai luai a hlauhawm ve thei bawk.
Sorkar lam hian kar khat lockdown a ruahman a, hemi chhunga target a neih a ngai a, chutiang chu tihhlawhtlin a tum tur a ni ang. Tin, ruahmanna khal tawk tak hemi chhunga tihpuitlin tum a neihte hi a tihlawhtling lo a nih chuan kan dem a nih pawhin a pawm ve mai a ṭha ang a, chutiang ti thei tura mipuiin thuneihna kan pekte an ni bawk, chhuanlam siam a rem lo ang.
Chawplehchilha ruahmanna siam thut ai chuan, 'hetiang hi kan dinhmun a nih chuan - chutiang chu kan ti ang' ti lawk deuha ruahmanna duan lawk neih pawh a ṭha viau. Sorkar aṭanga ruahmanna hi sorkar hnathawk (Executive) hnena a tlachawpa hrilh zel ai chuan a hawizawng (direction) chiang taka hrilhin thuneihna pe se, kan chiai lo deuh thei ang.
Indona lamah pawh Ram hruaitu (President) chuan 'direction' chiang tak a pe a, chu chu General, Colonel, Major etc inkhaidiat ang zelin an inhrilh leh a, an kengkawh mai ṭhin.Indo tawh laklawh laiin ram hruaitu va inrawlh reng a theih loh a, thutlukna chawpchilh siam ngaia an inrawlh thuk lutuk chuan sipai an buai ṭhin.
Chuvangin 'hetiang hi a nih chuan - hetianga hma lak tur' tih sa an nei vek a, chu chu 'rules of engagement' a ni. Inpawmchilhna ang chi-ah Major thuneihna chin lo ni ta se, a chunglamin an thupek tawhah thuneih an va tum lo a, an inbeihnaa sipaiho thu an peknaah thutawp an nei mai ang hian thuneihna kan pek chinte kan rin ngam a, an thawh tur chin ṭha taka an thawh theih nan kan va tihbuai chhen loh te pawh a ngai.
Mahse 'direction' chiang tak erawh pek ngei ngei a ṭul thung. Hetianga 'executive direction' lam hi hmasawn kan ngaihna tak pawh a ni awm e
إرسال تعليق