“Prime Minister Pu Narendra Modi hova hmarchhak state Chief Minister ten COVID-19 hrileng mek chungchanga tunhnaia video conference kaltlanga meeting an neihah Media Outlet thenkhat chuan Mizoram Chief Minister Pu Zoramthanga thusawi thenkhat dik lo takin an kailek a. “Kan thulakna (source)-in a tarlan danin Mizoram Chief Minister chuan a State chhunga COVID hri punna chhanah Myanmar leh Bangladesh atanga refugee lo lut te puh thu leh tanpui an ngaih thu Prime Minister a hrilh” tiin an tarlang a. Hei hi thu belhchiandawl lo leh a ngaithlatu leh chhiartute tana ngaihtuahna hruai sual thei thil a nih avangin Chief Minister’s Office chuan a ngai thutak hle a ni,” tiin.
“Tunlai khawvel thiamna sang tawh takah thuthar thehdarh pawh a awlsam lehzual ta a. Thu belhchiandawl lo thehdarh hian mi tam tak thinlung a hliam thei a; chi leh chi, hnam leh hnam inkarah khi a siam thei tih hriain thuthar thehdarhtute pawhin an thulakna (source) a dik tawk em tih finfiah a, fimkhur lehzuala thu kan puan zar thin a tul a ni,” tiin sawrkar thuchhuah hian a tarlang a.
Sawrkar thuchhuahah hian a thuhmahruaiah, “Prime Minister leh hmarchhak state Chief Minister ten virtual meeting an neih tuma chief minister thusawi chanchinthar thenkhatin an chhuah dan chung changa Chief Minister’s Office thuchhuah” tiin tarlan a ni bawk. Sawrkar thuchhuah atang hi chuan, hetiang thu hi Mizoram chhunga chanchinbu-ah te chhuah ni mai awma ngaih theih a ni a, eng chanchinbu berah nge tihchhuah a nih tia zawn chiam mai a awl hle awm e.
He thu thehdarh hi Mizoramah pawh social media lamah thehdarh a ni a, mahse Mizo tawng ni lovin saptawng a ni a, hetiang hi a ni: “Sources say the Mizoram chief minister told the PM that the rise in Covid cases in his state was due to the constant influx of refugees from Myanmar and Bangladesh, and sought his intervention” tiin.
Mizoram I&PR thuchhuah hian, “Hripui thawhkhatnaah hian Chief Minister chuan hripui dona kawngah Mizoram a chet that thu leh hri kai pawh an tlem hle thu a sawi a. Hei hi mi tlawmngaite inpekna avang a ni tiin chhuanawm a tih thu a sawi a. Heta kum kaltaa COVID-19 dona chungchang a sawiah hian Myanmar leh Bangladesh raltlan (refugee) te avanga hri kai kan pung tih khawiah mah sawina a awm lo a ni,” tiin a tarlang bawk a ni.
Hetianga Mizoram chief minister thusawi, dik lo baksaka puangzartute hi Mizoram chhunga thuthar thehdarhtute niin an lang lo a, Mizoram sawrkar hian thudik lo thehdarhtute hi chhuiin an thu thehdarh dik loh dan hi siam tha leh tur leh ngaihdam dil tura a phut ngei hi a ngai niin a lang.
The Aizawl Post
Editorial
He thil hi a zia lo ka ti khawp mai. Report tu hi Mizo a nih hmel si a. A tihpalh aiin tum reng vanga ti a nih hmel. Zilh deuh chu a ngai a ni.
ReplyDeleteTin, mahni ram hruaitu lu berte zahpahna nei miah lo hi an thahnem ta viau mai. A pawi hle a ni. Kan ram hruaitu lu ber te chu an fel tawk lo pawh a ni thei, tlin tawk lohna tam tak pawh an nei ngei mai. Kan ram a roreltu tura Pathian min pek an ni tih leh kan ram mipui zinga duhtu tam ber an nih avang hian an zahawm a. Anmahni mihring an lo zahawm vak lo a nih pawhin, an nihna leh dinhmun zahawm zia hriat hi khua leh tui tha mawhphurhna a niin ka hria.
Mipuiin kan duh lo a nih chuan inthlan leh hunah kan thlak leh mai thei a. Dinhmun zahawm taka an din chhung hi chuan an zahawmna humhim sak hi kan ram mipuite mawhphurhna a ni.
Kan CM kalchhuak ta leh CM ni mekte nuihza siamnan ka hmang e an ti te hi ka nuih an tiza ve hauh lo. An thawk tha a, fak an phu ka ti lo a nih pawhin an dinhmun zahawmzia ka hriat a pawimawh khawp mai.
Post a Comment