Tunlai social media khawvela tawngkam hriat lar tak chu ‘Fake Account’ tih hi a ni awm e. Mizorama kan hman lar em em Facebook ah hian Fake Account a tam hle a, tleirawl leh rualthar rual zingah anmahni account pangai bakah fake account 1 emaw a aia tam nei an tam hle a ni. Fake Account siam chhan hrang hrang zingah advertisement atana siam, Facebook leh Online Offer hrang hrang dawn duh vanga siam, midang ‘troll’ na tura siam, mi ‘stalk’ duh vanga siam, midang sawiselna tura siam, lerh leh hur herh hrim hrim vanga siam, mahni account pangaia mawilo thil tih duh vang leh sum hmuhna atana mi bum nana siam te hi Fake Account siam chhan lar zual te chu an ni awm e.
Tun hnaia kan hriat chu mipa pakhat thlalak hmangin hmeichhe pakhat hian fake account a siam a, damlo leh natna khirh tak nei ang a insawiin group te a siamin inenkawlna tur pawisa te a lo dil kual thin a ni awm e. Chu lo leh chu nula pakhat thlak hmangin hmeichhe dang pakhat hian fake account a siam veleh a, chumi hmang chuan mipa hrang hrang be kualin a mipa biak nel deuhte hnenah pawisa te pawh a lo dil thin niin group pakhata an lo post ka hmu bawk. Mipa thenkhat, fake account siama hmeichhe hrang hrang be kual a, an lo biak that loh deuha chung an hmeichhe biakte tih mualpho tum te, hmeichhiat mipatna lam hawia thu leh thlalak thawn thinte hi sawi tur a awm reng bawk.
Facebook vela fake account siam hrim hrim hi Facebook lama account remove tura tih bak chu a hremna a awm lem lo a. Amaherawhchu a chunga kan sawi ho anga midang tihbuaina leh bumna te, midang tihhmingchhiatna te, a neitu phalna loa mi thlak hmanga account lo siam angte erawh a hremna a na talh talh hle. IPC section 468 angin mi bumna atana fake account siam hi kum 7 thleng tang tura hrem theih a ni a, midang thlalak emaw hming emaw hmanga an phalna la lova fake account lo siam hi IT Act, 2000 section 66D angin kum 3 thleng bakah cheng nuai 1 thleng chawitir theih a ni bawk.
Hmeichhiat mipatna lam hawi leh thlalak kaihnawih lam thil te hi IT Act, section 67A ina a sawi angina kum 5 atanga kum 7 thleng tan theihna leh cheng nuai 10 thleng chawi theihna case a ni. A chunga kan sawi bakah pawh Fake Account hmanga thiltih sual azirin hremna tur dan hrang hrang a la awm bawk a ni tih kan hriat a tha awm e. Fake Account avanga harsatna tawk kan awm anih chuan Police hnenah hriattir vat zel tur a ni. Police Cyber Crime Branch te hian IT kaihhnawih sualna leh cyber crime lam chhui hi an thiam hle a, kar lovah fake account siamtu kha an chhui chhuak mai dawn a ni.
Fake Account siam hi inkhap tak tak theih a ni lo a, a la awm belh zel dawn. Fake account kan siam dan leh siam chhan te, kan hman dante hi kan mizia chhungril tarlangtu pawimawh tak a ni. Chhun enga kan tih duh loh hi zan leh thim thamah kan ti duh fo thin a, a langa mawi, chhungrila tawp em em si kan nihzia tarlangtu a ni. Information Age khawvelah kan chen mek avangin social media manners te, social media hmansual pawizia te hi chhungkuaah, zirna inah leh biak inah te kan inzirtir nawn fo hi a tul tawh em em a ni.
Fake Account siam hi inkhap tak tak theih a ni lo a, a la awm belh zel dawn. Fake account kan siam dan leh siam chhan te, kan hman dante hi kan mizia chhungril tarlangtu pawimawh tak a ni. Chhun enga kan tih duh loh hi zan leh thim thamah kan ti duh fo thin a, a langa mawi, chhungrila tawp em em si kan nihzia tarlangtu a ni. Information Age khawvelah kan chen mek avangin social media manners te, social media hmansual pawizia te hi chhungkuaah, zirna inah leh biak inah te kan inzirtir nawn fo hi a tul tawh em em a ni.
إرسال تعليق