Dated 8-11-2021
Vawin dated 8-11-2021 hian Lalbiakthanga Pachuau, Prominent Journalist leh C Kamlova te chuan chu India khua leh tui, michhuanawm leh hnathawktha chung-chuangte chawimawina sang ber Padmashree Award (Literature & Education- Journalism) chu India ram President, Ramnath Kovind, President hnen atangin Rastrapati Bhavan atangin an dawng.
Padma Shree dawngtu Labiakthanga Pachuau chaun a suangtuah ngai miah loh c leh a beisei ngai loh chawimawina a dawng chu thinlung taka Pathian leh mipuite hnena lawmthu a sawi. He chawimawina a dawn theihnaah hian a thawhpui chanchinbu mite zawng zawng phungbawmna leh kaihruainaah lawmthu a sawi a. A thawhpui tho Association of Voluntary Blood Donation (AVBD), Mizoram leh Mizoram Social Defence Coun-cil te pawhin theihtawpin an vawrh sang a, chawimawina sang tak a dawn theih phahnaah pawh an phungbawmna a tel a ni a ti.
Lalbiakthanga Pachuau hi kum 1927, March 25 khan Saichal khuaah nupa tuak, Satkunga(L) leh Dokungi(L) te inkarah a lo piang a. Amah hi World War II veteran niin Sipai huaisen chawi-mawina Indopui Pahnihna Tangkapui(World War II Medal), Burma Star, Independence Medal, J&K Medal, Sainya Seva Medal leh a hnathawh that avanga chawimawina dangte pawh dawng a ni.
Lalbiakthanga Pachuau hi ram hmasawnna atan leh mipui vantlang rawngbawlna atana a hun pumhlum hmangtu a ni a. Hlawhtlinna tam takah a bul tantu, sulsutu leh hmahruaitu a nih bakah vangtlang rawngbawltu tlawmngai pawl hrang hrangah nihna nei tawh leh nei mek a ni. Tunhnai maia nihna a chelh mek leh a chelh tawh te : President, Association for Voluntary Blood Donation, Mizoram (2010 to 2014), President, 2nd World War Veteran Association leh President, Mizoram Social Defence Union ah te leh Kawng tam takah mipui tan rawngbawlna a nei a ni.
A bik takin a thlawna Thisen Pek intihhmuh Mizoramah a lo nih theine kawnga bul tantu leh thawh hlawk ber zinga mi a ni. Active Journalist kum 1980 atang khan tun thlengin a la ni a; Editor, Mizoram Tlangau hna kum 30 a thawk tawh a. Journalism tan a thawhhlawk em avangin kum 2011 April thla khan Mizoram Journalist Association(MJA) chuan chawimawiin “Prominet Journalist” nihna an pe a ni. President, AVBD a nih hun chhung kum 2011 khan kum 2001 kuma voluntary blood donation 22.47 % chu 91% a rawn chho thei a ni.
Lalbiakthanga Pachuau hmalakna leh thawhrimna zarah United Commercial Bank Ltd leh National Insurance Co.Ltd te hi din a lo ni a. Ruihlo leh sualna hrang hrang laka khawtlang venhimna kawngah te leh Hmeichhe Naupang khuaikhem tawkte humhim leh nun kaihruaina kawngah te mi inhmang leh hruaitu chan chang thin a ni a. Amah hi pa khawhawizau, khawvel ram hrang hrangte pawh tlawh tawh a ni a. USA, UK, Denmark, Jordan, Netherlands, Israel, Egypt, Germany leh UAE te pawh a lo tlawh tawh a ni.
Post a Comment