-
Zawhna: Ka pu, hmeichhia kum 20 mi ka ni a, tunhma chuan hmaibawl ka nei ngai lova, mahse thla thum vel kalta atang khan ka thi neih a mumal lo va, ka hmai a rawn bawl ta tlat mai a, a bawl hi a awm belh zel bawk a, ka inentir a, damdawi min chawhte ka ei a, ka hnawih bawk a, a zia hret na a a la reh kim thei lo. Engtia tih zel tur nge? Min puh theih chuan ka lawm ngawt ang.
Chhanna: Hmeichhe thi neih (menstruation) hi taksa inrelbawl dan complex tak mai, hormones hrang hrang inkungkaihna atanga lo thleng thin a ni. Reproductive hormones kan tih mai, mipa leh hmeichhia kan nih phung rawn thlentirtu hi chi hrang hrang a awm a. Hmeichhiaah chuan an chibawm (Ovary) atangin a insiam deuh ber a, a bak chu thluak lamah a ni a, thyroid hormones te pawh hi he inkhaidiatah hian an pawimawh tel bawk. Mipaah chuan tilmu hi a insiamna ber a ni bawk a. Hmeichhe hormones bik – Estrogen leh Progesterone a awm a, mipa hormones bika kan sawi Testosterone pawh hi hmeichhiain an nei ve tho bawk.
Thluak lam atanga signal rawn kalin hmeichhe chibawm a hormones insiam tur hi a rawn control a. Chu signal inkhaidiat danah chuan felhlel a awm chuan mipa hormones bik Testosterone hi a rawn siam tam ta thin a, chu chuan harsatna chi hrang hrang a thlen thei a. Polycystic Ovary Syndrome (PCOS) hian hmeichhe chibawm (ovary) a rawn ti thang a, bawk tui pai tereuh tete a rawn insiam a, hei hian Testosterone insiam hi a rawn ti nasa zual thin a. Chu chuan thi neih buai a thlen duh a, hmai bawl te, hmai leh awmbawr hmulte a rawn awmtir thei a, taksa rih belhte a thlen fo bawk.
PCOS hi hmeichhia, a bikin kum la naupang/tleirawlah a common khawp mai a, 10% laiin an nei niin zirchianna chuan a sawi. He harsatna hian kan tar lan tak hmaibawl hi a thlen duh hle mai a, chuvang tak chuan hmaibawl nasaah chuan Ultrasound hmanga chibawm enchian a pawimawh hle a ni. PCOS hi enkawl tel a nih loh chuan hmaibawl hi a dam mawh hle. Hormone tests te pawh a tih theih tawh a, hmeichhe hmaibawl nasaah chuan an chawh fo thin.
Hmaibawl (acne) kan tih hian a nasa zual, ser siam chite a awm thei a, hetiang hian hmeichhia nun a tihrehawm duh hle. Taksa thau leh mawm a lo insiam hnem a, an lo rih belh bawk avangin ei leh in chungchangah pawh fimkhur tel a tha hle. Mawm insum a pawimawh khawp mai a, tui in tam leh zan mut thatte a pawimawh hle bawk. Hmai enkawl kawngah hian fimkhur a ngai hle a, sahbawn phuan duh lutukte hi a tha lo thei a; tin, hmai hruk fai danah pawh a hruk a hruk aiin a deh fai hi tihdan tha zawk a ni fo.
Engpawhnise, i lo inentir tawh tih i sawi a, i harsatna hi a la ziaawm thei lo a nih chuan skin doctor hnenah inentir nawn leh thei la. Ultrasound te pawh an chawh ngei che ka ring a. Tunlai kan doctor te hi an thiam tawhin an enkawl dam hnem tawh khawp a, khawl leh hmanraw tha tak tak an nei tawh bawk a, an enkawl dam theih ngei che ka beisei.
Post a Comment