- Laldinpuia, Secy Serchhip District Consumer Association
Khawvelah hian kumhlun tur engmah a awmlo tih hi Kristian te kan inzirtir dan leh kan inhnemna ber a ni a, hei hi a lo dik khawp mai. Thil reng reng hian tawpchin a lo nei a, dam thlen chin a lo nei zel a ni. Mihring chauh hi thi thin kan nilo, kan hmanrua leh thilsiam te pawh hian hnathawh theih chin, an chakna leh theihna ina a tlinloh chin/an thih hun a awm thin. Mipui nawlpui ina kan mamawh leh chhungkaw tin tana pawimawh em em mai Gas Cylinder te pawh hian dam thlen chin a lo nei a, a dam chin piahlam anih tawh chuan mihring te tan a hlauhawm thei a, kangmei emaw chhiatna dang emaw thlen thei a lo ni reng a ni tih hi mitin hian kan hriat chian a pawimawh hle a ni.
Mithiam ten an sawi dan chuan Gas Cylinder hi kum 10 aia tam hman chuan mihring tan a hlauhawm tawh a ni an ti a, kum 10 danah chuan Gas Cylinder hi a thattawk leh tawkloh mithiam te check tir zel tur a ni an ti. Eirawngbawl nan Gas hi chhungkaw tinin kan hman deuhvek tawh avangin kan Gas Cylinder te a dam chin a lo pelh tawh chuan chhungkaw eirawngbawltu tam tak chu kan hriat lohvin Bomb puak mai thei bulah kan lo awm ru reng mai thei a ni. Chuvang chuan kan Gas Cylinder hman te hi a la dam tha em? A la him tawk em tih hi kan chhut fo a tul a ni. Engtin nge kan Gas Cylinder hman chu a himtawk leh a him tawkloh kan hriat tak ang? A chhanna chu awlsam te a ni, mithiam rawn kher a ngai lo a, mipui nawlpui pawhin kan Gas Cylinder a a inziah dan atangin awlsam tein kan hre thei a ni.
Gas bur chunglama sir thum awmah hian Gas bur thih hun tur chu Code hmanga ziah a ni a. I Gas bur kha han en chhin la, a chung sir chhunglamah khan Alphabet A, B, C, D te zinga khawi emaw ber inziakin a zawhah number in ziah chhunzawm a ni ang. Entirna D – 20. Alphabet ‘A’ a inziah chuan First Quarter (Jan-March) tihna a ni. ‘B’ a inziah chuan Second Quarter (April-June) tihna a ni. ‘C’ a inziah chuan Third Quarter (July-Sept) tihna a ni. ‘D’ a inziah chuan Fourth Quarter (Oct-Dec) tihna a ni. Alphabet zawha number inziak hi a damchen kum tihna a ni.
Entirnan –
1) Kan Gas bur pangah khan D-20 tih lo inziak ta se, a awmzia chu kan Gas bur hmanmek chu December 2020-ah a thi dawn a, chumi hnuah chuan hman a him tawhlo tihna a ni.
2) Kan Gas burah C-18 te lo inziak ta se, kan Gas bur hmanlai chu September 2018-ah a thi dawn tihna a ni ang.
Hetiang zel hian kan Gas bura a inziahdan ang zel khan awlsam takin kan Gas bur dam chen tur hi a chhut ve mai theih a ni.
Heng Expiry date pelh tawh hnua Gas bur hman te hi a hlauhawm em em a, kangmei chhuah, Gas leak, Gas puak a thlen mai a hlauhthawnawm avangin mipui ten hman loh a him ber a ni. Tin hemi kawngah hian mipuite fimkhur ila, kan Gas Cylinder lei te hi a damchen a tawp tawh em tih te hi Gas bur kan lak pah hian check thin ila, a dam chen pel tawh Gas bur chu lei loh tur a ni.
Mipui ten Dan hi hria in zawm ila, kan harsatna tawh tam tak hi kan pumpelh thei ngei ang.
Post a Comment