Mizo kutchhuak PPE Set 3000 hlan

Aizawl 16th July 2021: Vawiin khan Health Minister Dr R.Lalthangliana, Commerce and Industries changtu ni bawk chu Commerce and Industries Department buatsaih Health Department hnena Mizo kutchhuak PPE set 3000 hlanna programme, MINECO tualzawla neihah khuallian a ni.

Minister Dr R.Lalthangliana chuan Mizo siam ngei PPE set, thawktu ten ICU chhungah pawh an hak theih tur khawpa tha, ZMC doctor te duhdan anga thui PPE engemawzat Health Department hnenah hlan a ni ta chu lawmawm a ti a. Thil thar danglam tak siam chhuah ni satliah mai lovin, mi engemawzat tan eizawnna siamsak a ni hi thil chhinchhiahtlak tak a ni, a ti. 

Minister chuan Mizoram chhung mipuite thui leh siamchhuah ngei state mipuiten kan hman uar a tul tih sawiin hripui len hunlaia Mizo siam mask, ppe, faceshield hman kan uar ang bawkin hripui kiam hnuah pawh mahni state siam chhuah leh thar chhuah hman uar kan zir a tul, a ti a. State pawnah leh ramdang thlenga thawn chhuah tlak khawpa kuthnu mam nalh leh quality tha kan thui leh siam zel a pawimawh tih hria a, chutiang siam thei tura an ngaihtuahna hmang turin puan thui leh thiamhnangdeh lama eizawngtute a fuih a ni.

State Executive Committee (SEC) thukhawm chuan May ni 30 khan State Disaster Response Fund sumin tualchhung siam chhuah PPE hman ni se tiin a rel a. Hemi bawhzui hian Commerce & Industries Department chuan “Scheme for Support of Local Artisans who lost their sources of livelihood due to COVID-19 pandemic/lockdown” a siam a. Veng hrang hranga Local Level Task Force ten tualchhung puanthui thiam, chhawmdawl ngai  thlang chhuakin PPE set 36,000 thui tura ruahmanna siam a ni. PPE set te hi ZMC Doctor te duhdan ang thlapa sample buatsaih a ni.

He scheme kalpuina tur hian a bul tan nan DM&R atangin cheng nuai 140.36 chu July ni 7 khan  dawn a ni a. A thawhkhatnaah PPE set 21,600 thui tura ruahmanna siam a ni. Puanthui thiam mi 300 thlan chhuahte hnenah PPE thui tur, zaisa, hmanraw pawimawh dang nen Department chuan LLTF te kaltlangin a pe a. PPE set khat hi Rs.150 zela thui tir niin puanthui pakhat hian PPE Set 50 zel an thui a ni. July ni 14 thlengin PPE thui zawh tawh lakkhawm tawh zawng zawng hi 5360 a ni a. July ni 1 khan Health & Family Welfare Department hnenah Set 2000 an lo hlan tawh a ni.

Vawiin programme hi Commerce and Industries Secretary Pi Esther Lal Ruatkimi’n a kaihruai a. DM&R Secretary Pi Lalbiaksangi, Health Secretary Pu R.Lalramnghaka, Agriculture Secretary Pu J.Hmingthanmawia, Commerce and Industries Director ni bawk te leh mi pawimawh dangte an tel a ni.

Written by: Lalnunmawii, MIS, IPRO Dated: 16th Jul 21 2:57 PM