Saptawnga unity is strength tih hi latin phrase chuan - ex unitae vires tih a ni. Kum 2000AD hmalam khan South Africa chuan ex unitae vires latin phrase hi National motto atan an hmang tawh thin a ni. Hmawlhte pakhat ulh tliah ai chuan sawm telkhawm ulh tliah a har zawk ! A chhan chu an tanrual tlat vang a ni. Tanrual hi chakna a ni tih hian inpumkhata lungrual taka tan tlanna hi a kawk ber; hneh har tak an ni. Tam ringawta tanrual a nih loh chuan ek vuak pherh ang mai a ni. Mi tlêmte pawh ni se, An tanrual tlat chuan hneh an har hle thin.
TUTE NGE TANG RUAL ?
Harsatna tãwk hlek ila Mizote kan tlêm tham êm avangin kan zãm deuh thin. Sept. 2020 thla tir atanga Oct. 29, 2020 inkar chhunga Assam State (Cachar district) Official thenkhatte'n Bangladesh atanga pem khawm Bangladeshi immigrant-ho hmanga min rawn chawh buai khan Mizote kan tangrual hle tih kha a takin a lang chhuak a, a lawmawm hle.
Harsat na a awm apianga an nawma mãka Silchar lamin economic blockade an chelek fo thinte kha a thinrim thlak thei hle. A hmatawnga awm vairengte khawtlang huaisenzia leh tanrualziate kha a van ropui tehlul em ! Chawimawi na nopui dawm tlak ngawih ngawih an ni.
Thalaite'n ram chhan nan hliam tuarin an thisen hial a far a nih kha ! Thenawm state leh khawvel ramdanga kan Zo hnahthlak awmte'n kan zãm hlaua kan thlavang an rawn hauh liam liamte kha a va'n ropuiin a va'n hlu tehlul êm !
Oct 29, 2020 (3:00pm) -a Home Minister hova Official thutkhawm hmanhmawh neih zawh veleha kan home Minister zahawn takin Press mite hmaa hnam anga tanrual hun a nih thu leh mipui mamawh chãkkhai lam khawm dan tur kawng dang dap mek a nih thu te, a chhuanchhe zawnga inpuhmawh hun a nih loh thu a sawite kha a ropui takzet a; Sorkar, CYMA; MZP; MSU; NGO; MGYA (Khukri party), Political parties, State Police etc kiltin atanga tanrualna kha a van hlu tehlul em !
Kan Chief Secretary-in biak hmuh theihna kaltlanga Union Home Secretary leh Assam CS hmaa huaisen taka ramri atanga kan police dahte hnuhkir mai theih a nih loh thu leh mipui thlabar taka awm mêkte himna ngaihtuah a tul thu a sawite kha a van fakawm tehlul em! Khami tum ang rênga tanrualna kha India rama State ralmuang ber kan nih hnuah a thlen vawi khatna niin a lang. Hei tak hi a ni- TANRUAL HI CHAKNA A NI an lo tih thin chu!
Chutianga tangrualte chu Mizote ngei kan ni e CHÃWL HMAN KAN NI LO June 29.6.2021 atang khan Hailakandi SP Ramandeep Kaur IPS, hovin Assam police mi 200 velte chuan Mizopa thlam leh thlai tihchhiain Pu Chhandama, Field veng, Vairengte ramah chet an rawn laleh ta a. Assam police-te hi Pu Chhandama, Field veng thlam an tihchhiat bulah inkulh an tum chu vairengte bawkin hma lain an phal lova.
A hnu dar 7:30pm khan an SP hova lo thawklehin mipui tlem te paltlang luiin Pu chhandama huanah hian inkulh tûrin riahrun an rem lui a. Mizoram sorkarin rem a tih avang hian Vairengte mite chu an tawlh ve ta a, luah zui tir an tum loh thu erawh an sawi tel. Kolasib Addl DC hovin IR sipai battalion 1 tling lo an awm laiin Assam lam hi Hailankandi SP hovin Company 2 vel an lo kal a, he lai ram hi luah ngei an tum angin an luah lui ta a ni.
Vairengte Joint VC-te thuchhuah angin ramriah Mizoram Police-te riah bûk sak hnatlang neiin IR duty-na tur an buaipui a; 02/07/ 21 hian Assam policehovin an thiatleh nia sawi a ni. Tanrual hi chakna ni mah se, tam bawk a, tanrual bawk phei chu chak lehzualna a ni.
Abrahama policy kalpuiin mizote'n chi inthlahpun lamah tan la thar sauh sauh ila, sãwn pai, pãi tlang leh ngam lova tihtlak tum mekte paw'n thahnem ngai takin pãi tlang hram hram se, chutiangin tlangvalte pawhin tan la tharin nau titla lo turin nulaho fuih thin se. Nu leh pa fa la nei theite'n theihtawpin tan la theuh bawk ila; Mizote'n kan tam hneha kan tanrual tlat chuan hnehna kan la chang ngei ang.
A TLANGKAWM NA
Assam nena state ramri buai thuah mipui inlung rual tlãnna ber Notification No 2299P dated 20th August, 1875 kha lungrual takin a tãwp thlengin tanchhan tlat ila, kan chinfel chhungin hemi anga ramri rin chin zelah mipuiin luah khat nghal zel bawk ila, tharum thawh kher ngai lovin kan ramri dik tak kan humhim reng thei dawn a ni.
A chhunga chêngte pawh hian kum 1875 notification anga inner line hi kan hre chiang lo a nih chuan Survey of India, The National Survey & Mapping Organisa tion of the country under the Department of Science & Technology-ah ramri rin chiang taka kan hriat theih nan thlenin bawhzui ila, chumi chin zelah chuan State pahnih te remtihtawnnain Border fencing 5ft tala chhahin hung chhuak vek ila, chumi hnu pawha min la rawn chawkbuai fo a nih chuan engang pawhin lo dolet ila tuma'n min dem thei lovang.
Engpawhnise, kan State Chief Minister leh Councl of Ministers zahawm tak, Ministry-in Zoram mipuite min thlãwp that êm avangin hetianga tanrualna hi kan nei thei a, a lãwmawm takzet a ni. Kum dang anga ramri humhalhtu Zirlaite leh hmalatute man khawm nghal zel ang kha thleng se'ng chuan hetiang hi kan thleng pha hauh lovang a, tuna kan luah mek chin pawh hi kan chãn then teuh tawh ang.
Hetianga kan State Sorkar, Zoram mipui zawng zawngte leh Zo hnahthlak zawng zawngte tanrualna ang hi tun hnuah pawh vawng nung zel ila a duhawm hle. A tãwp berah chuan he tanrual theihna hi Pathian vãng liau liau a ni tih hriain Pathian hnenah lawmthu i sawi theuh ang u.
NB: Article hi keima tawnhriat
leh ngaihdan public inerest atana ziah a
ni e.
(SeeArticle 19(1)(a) of the
Constitution of India & CCS rules 8(3))
- Dr. C. Lalrampana
إرسال تعليق