WHATSAPP FAKE NEWS
Er. Chhungpuia Renthlei
WhatsApp hming hi thumal pahnih What is up? leh Application atanga phuah a ni.
Whats : What is up(Engkim a tha vek maw /Thil diklo a awm em)?
App: Mobile Application Software(Mobile App)
Tichuan, WhatsApp chu atirah tak chuan Phone number hmanga hmelhriat te chibai bukna (Greeting) thawnna atana siam ani.Hmangtu te kan pung zela, Greeting atan mai bakah inkawmna leh chanchin thar inthawn tawnna atan kan hmang chho ta zel ani ber mai.
WhatsApp hi Feb 24, 2009 khan din a ni. Founders te chu Brian Acton leh Jan Koum an ni. Headquarters hi Menlo Park, California ah a awm. Kum 2014 khan Facebook in a lei India ramah kum 2010 khan kan hmang tana. India rama WhatsApp hotupa leh neitupa ber (CEO) chu Chris Daniels-a ani. Tunah hian WhatsApp hi India ah Maktaduai 500 laiin kan hmang.Khawvelahi tluk leh dingawn 2 zet kan ni. Nikum 2020 khan WhatsApp sum hmuh hi US dollar tluk leh dingawn 5 lai a tling. India pawisa chuan tluk leh dingawn 375 lai a ni.
Kum 2021 ah meuh chuan WhatsApp hmang thei apui kan tam ta a, tangkaipui pawh kan pung mek zel a, hmasawnna duhawm tak a ni.Tun aia kan hman tangkai thiam erawh chuan nakin lawkah chuan veng leh khaw tin maia tlangau ninawm tak tak te pawh a la tihreh mahna le!
WhatsApp hi fimkhur ngai tak, mi pawi sawi theihna, dan bawhchhiat theihna awlsam tak a ni.Group thenkhat te chu member chhangchhe tak tak, thu lawi lo, rintlak loh, miten an thu post chu engtiangin nge an lo dawnsawn ang tih pawh chhut lem lo, ninhlei/inhlei nana hmang tute an tam viau maithei e.Hmansual a nih loh nan emaw, thil tangkai leh pawimawh atana hman a nih theih nan inzirtirna lam uar hi kan mamawh tak pakhat ala ni zel dawnin a lang.
FAKE NEWS
Fake news chu thu belhchian dawllo eng thu pawh finfiahna leh thulakna(source) awm lo hi a ni.
Fake news chi hrang hrang langsar zual te:
1.Satire or parody:
Dawtthu naran leh pawisawi lem lo, mahse thu dik ni silo
2. Misleading content:
Mi rilru leh ngaihdan hruai sual thei dawt hmanga inbumna
3. Imposter content :
Hlawkna duh vang emaw, midang tihmualpho nana midang lem a chang.
4. Fabricated Content :
Original Document / Certificate siamdanglam
5. False Connection:
A thu nena inzawmna nei miahlo, Video/ Picture hmanga thil thleng thawndarh
Hremna theihna dan te:
Section 66D of Information Technology Act, 2008
Section 54 of the Disaster Management Act, 2005
Sections 153, 499 and 500, 505(1) of Indian Penal Code, 1860
WhatsApp Group chungchanga hriattur pawimawh:
Heng te hi hrem theih an ni.
- Mipat hmeichhiatna (porn clip), abik takin kum tling lo saruak thlalak post darhtu te.
- Zahawmna ti bawrhbang thei mi thlalak siam danglam post darh tu te.
- WhatsApp kaltlanga hmeichhe chhaihbuai tu te.
- Midang hminga WhatsApp account siamtu te.
- Thil lian tham thleng a awm a, mi rilru ti chiai thei leh thinrimna chawktho thei dawtthu thehdarhtu te.
- Ruihhlo leh sorkar phalloh hralh nana WhatsApp hmangtu te.
- Hriat loh laia mi thla lak saka, WhatsApp a thawndarhtu.
A tawp berah chuan, I fimkhur loh vangin nangmah bakah midangin harsatna an tawk thei. WhatsApp group admin te hi an groupah dan phal loh thu post a awm a, chhuichhuah an nih chuan jail ah tan tir theih an ni.Group tam takah awm loh tur. I tana tangkai tur leh group member ten an tangkaipui theihna ah chauh awm rawh. Groupah i awm ve anih chuan Group inkaihhruaina dan zawm la, thu post te comment/ like pe ve thin rawh.Engmah i ti peih lo anih chuan groupah awm reng lovin, chhuahsan mai la, tangkai taka hmang duhtu te tan remchang i siam a ni mai.
إرسال تعليق